२६ भदौ, बुटवल। बुटवलका व्यवसायी तथा सामाजिक नेता थानेश्वर पौडेलले हालै आएको बाढीबाट प्रभावित नागरिकहरूको राहतका लागि २५ लाख २५ हजार रुपैयाँ सहयोग गरेका छन्। रसुवाको भोटेकोशी नदीमा आएको बाढीबाट प्रभावितलाई राहत दिनका लागि पौडेलले यो रकम प्रधानमन्त्री दैवी प्रकोप उद्धार कोषमा जम्मा गरेका हुन्। पौडेलले व्यक्तिगत रूपमा नै यो रकम राहत कोषमा राखेको बताएका छन्।
पौडेल मानव धर्म सेवा समिति बुटवलका स्वयंसेवक र शाइन रेसुंगा डेभलपमेन्ट बैंक सञ्चालक समितिका अध्यक्ष पनि हुन्। उनले भने, ‘रसुवा, धादिङ, नुवाकोटसहितका जिल्लामा नेपाल इतिहासकै सबैभन्दा ठूलो विपत्तिको सामना गरिरहेका बेला मुलुकले ठूलो आर्थिक क्षति भोग्नुपर्ने पीडादायी अवस्था सिर्जना भएको छ। यसै कारण सबै नेपालीले सरकारलाई सघाउनुपर्ने जिम्मेवारीले कोषमा रकम जम्मा गरेको हुँ।’ पौडेलले अध्यक्ष रहेको शाइन रेसुंगा डेभलपमेन्ट बैंकले यसअघि नै ६५ लाख रुपैयाँ प्रधानमन्त्री दैवी प्रकोप उद्धार कोषमा जम्मा गरिसकेको पनि जानकारी दिएका छन्।
