भारतीय प्रधानमन्त्री नरेन्द्र मोदीले नयाँ दिल्लीमा शुरु भएको ब्रिक्स शिखर सम्मेलनको उद्घाटन सत्रमा ब्रिक्स समूह कसैको विरुद्ध नभएको बताएका छन्। उनले पछिल्लो २० वर्षमा ब्रिक्सले विश्व मञ्चमा महत्वपूर्ण स्थान बनाएको र एकता तथा सहमतिलाई ठोस परिणाममा परिणत गर्ने समय आएको जनाए।
मोदीले विश्व शासन प्रणालीमा सुधारका लागि १० सूत्रीय रोडम्याप प्रस्तुत गर्दै संयुक्त राष्ट्रसंघ सुरक्षा परिषदमा सुधार अब थप प्रतीक्षा गर्न नसकिने बताए। उनले भने, “हामी एकअर्काको दृष्टिकोणको सम्मान गर्छौं र सहमतिका साथ अगाडि बढ्छौं। अब हाम्रो एकता र सहमतिलाई विश्व मञ्चमा ठोस परिणाममा बदल्ने समय आएको छ।”
उद्घाटन समारोहमा रुसी राष्ट्रपति भ्लादिमिर पुटिन, चिनियाँ राष्ट्रपति सी जिनपिङ, इरानी राष्ट्रपति मसुद पेजेस्कियान, दक्षिण अफ्रिकी राष्ट्रपति सिरिल रामाफोसा, मलेसियाका प्रधानमन्त्री अनवर इब्राहिम र इन्डोनेसियाका राष्ट्रपति प्रबोवो सुबियान्तो पनि उपस्थित थिए।
मोदीले ग्लोबल साउथले नियम मात्र पालना गर्ने नभई नियम निर्माण गर्ने पक्ष पनि बन्नुपर्ने आवश्यकता औंल्याए। उनले भने, “आज ग्लोबल साउथ विश्वव्यापी संकटको पहिलो पंक्तिमा छ, तर निर्णय प्रक्रियामा उसको स्थान पछाडि छ।”
सम्बन्धित खबर
