स्पेसएक्सको स्टारशिप १४औँ प्रयासमा सफलतापूर्वक पृथ्वीको कक्षमा प्रक्षेपित

१३ असोज, काठमाडौं । इलोन मस्कको कम्पनी स्पेसएक्सले निर्माण गरेको शक्तिशाली रकेट ‘स्टारशिप’ पहिलोपटक पृथ्वीको कक्ष (अर्बिट) मा सफलतापूर्वक पुगेको छ। २८ सेप्टेम्बरमा गरिएको स्टारशिपको १४औँ परीक्षण उडानका क्रममा २६ वटा नयाँ प्रविधिका स्टारलिंक स्याटेलाइटहरू समेत अन्तरिक्षमा पठाइएको छ। नेपाली समयअनुसार साँझ साढे ६ बजे टेक्सासस्थित स्टारबेसबाट स्टारशिप प्रक्षेपण गरिएको थियो। यसअघि स्टारशिपका सबै परीक्षण उडानहरूलाई सब–अर्बिटल ट्राजेक्टोरीमा सीमित गरिएको थियो। यसको उद्देश्य सुरक्षा कायम राख्दै रकेटको प्रदर्शनसम्बन्धी बढीभन्दा बढी तथ्यांक संकलन गर्नु थियो। यसपटक भने स्टारशिपले पहिलोपटक पृथ्वीको कक्षमा प्रवेश गरेको छ।

योजना गरिएको समयभन्दा अघि नै मिसन समाप्त भएको छ। सुरुआती योजनाअनुसार स्टारशिपलाई करिब १० घण्टासम्म पृथ्वीको कक्षमा घुमाउने तयारी थियो, तर मिसनका क्रममा गरिएको समीक्षा (रिभ्यु) पछि कन्ट्रोलरहरूले उडान छोट्याउने निर्णय गरेका थिए। उडान सुरु भएको करिब २ घण्टा १२ मिनेटपछि स्टारशिपको डी–अर्बिट बर्न पूरा गरिएको थियो। त्यसपछि उडान सुरु भएको करिब तेस्रो घण्टामा स्टारशिपलाई प्रशान्त महासागरमा सफलतापूर्वक अवतरण गराइएको थियो।

स्टारशिप स्पेसक्राफ्ट र सुपर हेभी बुस्टर गरी दुई मुख्य भाग मिलेर बनेको प्रणालीलाई सामूहिक रूपमा ‘स्टारशिप’ भनिन्छ। यसको उचाइ करिब ४०३ फिट अर्थात् १२३ मिटर छ। यसरी २०२३ मा पहिलो परीक्षण उडानबाट सुरु भएको स्टारशिपको परीक्षण यात्रा १४औँ उडानसम्म आइपुग्दा पहिलोपटक पृथ्वीको कक्षमा प्रवेश गर्ने चरणमा पुगेको छ। स्पेसएक्सले स्टारशिपलाई भविष्यमा मानिस र ठूलो परिमाणमा सामग्री अन्तरिक्षमा लैजान तथा पुनः प्रयोग गर्न सकिने रकेटका रूपमा विकास गरिरहेको जनाएको छ।