गान्धी जयन्तीको दिन जन्तरमन्तरमा मुख्य निर्वाचन अधिकृतको राजीनामा माग्दै प्रदर्शन

गान्धी जयन्ती अर्थात अक्टोबर २ का दिन दिल्लीको जन्तरमन्तरमा छात्र सङ्गठन र सामाजिक कार्यकर्ताहरूले विशाल प्रदर्शनको आयोजना गर्न तयारी गरिरहेका छन्। निर्वाचन आयोगको कार्यशैलीप्रति असन्तुष्टि प्रकट गर्दै मतदाता नामावलीको अद्यावधिक तथा ‘स्पेसियल इन्टेन्सिव रिभिजन’ (एसआईआर) प्रक्रियाप्रति असन्तुष्टि जनाउँदै मुख्य निर्वाचन आयुक्त ज्ञानेश कुमारको राजीनामा माग गरिएको छ। यस प्रदर्शनको आह्वान अल इन्डिया स्टुडेन्ट्स एसोसिएसन (आइसा), स्टुडेन्ट्स फेडरेसन अफ इन्डिया (एसफआई) र डेमोक्रेटिक युथ फेडरेशन अफ इन्डिया (डीवाईएफआई)ले गरेका हुन्।

प्रदर्शनको आह्वान भएता पनि दिल्ली पुलिसले जन्तरमन्तरमा आयोजना गर्न लागिएको मार्चलाई अनुमति दिएको छैन। अनुमति नपाए पनि सङ्गठनहरूले जन्तरमन्तरमा जम्मा हुने योजना बनाएपछि पुलिसले त्यहाँ पुग्ने सडकहरूमा ब्यारिकेड लगाएर कडा सुरक्षा व्यवस्था मिलाएको छ। नयाँ दिल्लीका डीसीपीले सामाजिक सञ्जाल ‘एक्स’मा लेख्दै भनेका छन्, ‘नयाँ दिल्ली जिल्लामा सार्वजनिक सुरक्षा, कानुन-व्यवस्था र यातायातको सुचारु आवतजावत सुनिश्चित गर्न भारतीय नागरिक सुरक्षा संहिता (बीएनएसएस), २०२३ को धारा १६३ लागू गरिएको छ। यसअन्तर्गत अनुमति बिना मानिसहरू भेला हुन, सार्वजनिक भाषण दिन, नारा लगाउन, जुलुस निकाल्न, प्रदर्शन वा धरना दिन र आदेशमा उल्लिखित अन्य गतिविधिहरू गर्न प्रतिबन्ध लगाइएको छ।’

प्रदर्शनलाई नियन्त्रणमा राख्न चालिएका कदमहरूको व्यापक आलोचना भइरहेको छ। सर्वोच्च अदालतका वरिष्ठ अधिवक्ता तथा सामाजिक अभियन्ता प्रशान्त भुषणले दिल्ली पुलिसको कदमको तीव्र आलोचना गर्दै एक्समा लेखेका छन्, ‘मोदी/शाहको आदेशमा दिल्ली पुलिसले जन्तरमन्तरको प्रदर्शन रोक्न मध्य दिल्लीलाई पूर्ण रूपमा बन्द गरिदिएको छ। ११ वटा मेट्रो स्टेशन बन्द गरिएका छन्, निषेधाज्ञा लागू गरिएको छ र इन्टरनेटसमेत बन्द गरिएको छ। पुलिसले जन्तरमन्तरलाई घेरेको छ र त्यहाँ भएका मानिसहरूलाई नियन्त्रणमा लिइरहेको छ। सांसद मनोज झालाई पनि हिरासतमा लिइएको छ।’

यता मुम्बईमा पनि ‘ककरोच जनता पार्टी’ (सीजेपी) का संस्थापक अभिजित दीपकेले अक्टोबर २ का दिन दिउँसो ४ बजे शिवाजी पार्कमा ‘जेल भरो आन्दोलन’ गर्ने घोषणा गरेका छन्। मुम्बई पुलिसले ज्ञानेश कुमार विरुद्धको प्रदर्शनलाई अनुमति नदिएपछि दीपकेले जेल भरो आन्दोलनको घोषणा गरेका हुन्। यद्यपि, मुम्बई पुलिसले सन् २०१३ मा बम्बे हाइकोर्टबाट जारी आदेश अनुसार शिवाजी पार्कलाई ‘साइलेन्स जोन’ मानिएको हुँदा त्यहाँ कुनै सभा-समारोहको अनुमति नदिने स्पष्ट पारेको छ। प्रदर्शनलाई आम आदमी पार्टी (आप)ले पनि पूर्ण समर्थन जनाएको छ। आम आदमी पार्टीकी विधायक तथा दिल्लीकी पूर्व मुख्यमन्त्री आतिशीले जनतालाई प्रदर्शनमा सहभागी हुन अपिल गरेकी छन्।