१६ असोज, काठमाडौं । राष्ट्रिय महिला तथा पुरुष जुनियर (यू–२०) इन्डोर कबड्डी प्रतियोगिता काठमाडौंमा सुरु भएको छ । अखिल नेपाल कबड्डी संघको आयोजनामा दशरथ रंगशालास्थित कभर्डहलमा सुरु भएको प्रतियोगिताको उद्घाटन राष्ट्रिय खेलकुद परिषद्को सदस्य–सचिव रामचरित्र मेहताले गरेका हुन् । प्रतियोगितामा पुरुष र महिलातर्फ ७ प्रदेशका ७ टोलीले सहभागिता जनाएका छन् ।
लिग कम नकआउटका आधारमा खेलाइने प्रतियोगिताबारे कबड्डी संघका महासचिव अरविन्द्र झाले जानकारी दिएका छन् । नयाँ प्रतिभा पहिचान गर्ने उद्देश्यले यो प्रतियोगिता आयोजना गरिएको महासचिव झाले बताएका छन् । यो प्रतियोगितामा उत्कृष्ट प्रदर्शन गर्ने खेलाडीहरूलाई साउदी अरबमा सञ्चालन हुने इन्डोर एसियन कबड्डी तथा नोभेम्बर २० देखि २५ सम्म नेपालमा आयोजना गरिने यू–२० फोर नेसन्स कपका लागि छनोट गर्ने तयारीमा कबड्डी संघ रहेको छ । प्रतियोगिता आइतबारसम्म सञ्चालन हुनेछ । तस्वीरः विकास श्रेष्ठ/अनलाइनखबर
