१६ असोज, वाशिङ्टन (रासस/एएनआई) । अमेरिकी राष्ट्रपति डोनाल्ड ट्रम्पले इन्धन मूल्य वृद्धि घटाउन युरोपेली देशहरूसँग उनीहरूको डिजेल भण्डार प्रयोग गर्ने आग्रह गर्न सक्ने संकेत दिएका छन्। पत्रकारहरूसँगको संवादमा उनले बजारमा डिजेल मूल्य घटाउन आपत्कालीन आपूर्ति जारी गर्ने मामिलामा युरोपेली सरकारसँग सम्पर्क गर्ने सम्भावनाबारे प्रश्न सोधिँदा आफूहरूले यसो गर्न सक्ने बताए। “मूल्य घट्दै गइरहेको छ”, ट्रम्पले भने। टेक्सास र ओक्लाहोमामा भ्रमणका क्रममा उनले यस धारणा व्यक्त गरे।
अमेरिकी डिजेलको बढ्दो मूल्य नियन्त्रण गर्न प्रशासनले निर्यातमा सम्भावित प्रतिबन्धसहित विभिन्न विकल्पहरूमा समीक्षा गरिरहेको उनले जानकारी दिए। उनका अनुसार निर्यातमा प्रतिबन्ध लगाउँदा पेट्रोलको मूल्य केही बढ्न सक्ने भएकाले उक्त विषय गम्भीरतापूर्वक विचार भइरहेको छ। हालको बजारमा अवरोधको मुख्य कारण मध्यपूर्वको अस्थिरता नभई रुसी प्रशोधन पूर्वाधारमाथि युक्रेनले गरिरहेको आक्रमण रहेको ट्रम्पले बताए। रुसले ठूलो मात्रामा डिजेल प्रशोधन गर्ने भएकाले त्यहाँका रिफाइनरीहरूमा भएका आक्रमणले आपूर्तिमा असर पारेको उनले बताए।
अमेरिकी डिजेल निर्यात सीमित गरी घरेलु भण्डार बढाउने विकल्पप्रति ३० भन्दा बढी अमेरिकी कर्पोरेट, निर्माण तथा ऊर्जा क्षेत्रका सङ्घहरूले विरोध जनाएका छन्। उनीहरूका अनुसार यस्तो कदमले घरेलु प्रशोधन घट्न सक्छ र मूल्यहरू बढ्न सक्छन्। युरोपेली साझेदार देशहरूको भण्डारबाट डिजेल आपूर्ति बढाउन खोज्दा अमेरिकी निर्यात नियन्त्रण गर्ने साटो बजारमा समग्र उपलब्धता बढ्ने अपेक्षा गरिएको छ। यद्यपि ट्रम्पले कुन युरोपेली देशसँग सम्पर्क गरिने वा कति परिमाणमा डिजेल माग गरिने भन्ने बारेमा स्पष्ट जानकारी दिएका छैनन्।
