२२ असोज, काठमाडौं । दूरसञ्चार कम्पनी भारती एयरटेलले एलन मस्कका आरोपलाई अस्वीकार गरेको छ। मस्कले आफ्नो स्याटेलाइट कम्पनी स्टारलिङ्कलाई भारतमा सञ्चालन गर्नबाट रोकिएको आरोप लगाएका थिए। भारती एयरटेलका अध्यक्ष सुनील भारती मित्तलले आफ्नो भनाइ सार्वजनिक गर्दै भनेका छन् कि आफ्नो स्याटेलाइट उपक्रम ईयूटेलसेट वनवेब पनि भारतमा सेवा सुरु गर्न स्वीकृतिको पर्खाइमा रहेको छ।
एलन मस्कले एक्समा एउटा पोष्ट गर्दै आफ्नो धारणा राखेका थिए। उनले भारतमा केही विशेष उद्योगपतिहरूले आफ्नो कम्पनी स्टारलिङ्कको स्याटेलाइट इन्टरनेट सेवाको प्रवेशलाई रोकिरहेको आरोप लगाएका छन्। मस्कले कुनै कम्पनीको नाम सोझै भनेका छैनन् तर उनले भनेका छन्, “तपाईं अनुमान लगाउन सक्नुहुन्छ कि उनीहरू को हुन।”
भारत सरकारले मस्कका यी आरोपहरूको जवाफ दिंदै भन्यो, “सोसल मिडियामा स्याटेलाइट सञ्चार सेवाका लागि भारतको नियामक फ्रेमवर्कमा निष्पक्षता नभएको भनेर एउटा पोष्ट भाइरल भएको छ। यसमा भेदभाव भएको भनिएको छ। तर भारतमा यस सम्बन्धी कुनै भेदभावपूर्ण नियमहरू छैनन्।”
