चीनले भारतले लद्दाखका २८ स्थानहरूको आधिकारिक नाम सार्वजनिक गरेको निर्णयलाई कडा आपत्ति जनाएको छ र यसलाई अवैध तथा अमान्य भनेको छ। चीनको विदेश मन्त्रालयकी प्रवक्ता माओ निंगले भारतको यो कदमले चीन-भारत सीमाको पश्चिमी भूभाग सधैं चीनकै भाग रहेको वास्तविकतालाई परिवर्तन गर्न नसक्ने बताइन। भारतको विदेश मन्त्रालयले पनि भनेका छन् कि लद्दाख भारतको अभिन्न र अविभाज्य हिस्सा हो र चीनको अस्वीकारले यो तथ्यलाई परिवर्तन गर्न सक्दैन।
भारतले एकपक्षीय रूपमा अवैध घोषणा गरेको ‘केन्द्रशासित प्रदेश लद्दाख’ लाई चीनले कहिल्यै मान्यता नदिएको उनले भनिन्। माओ निंगले मंगलबार भारतले लद्दाखका केही स्थानहरूको मानक नाम घोषणा गरेको विषयमा कडा विरोध जनाएकी छिन्। निंगका अनुसार, भारतको गृह मन्त्रालयले विवादित सीमा क्षेत्र र चीनको नियन्त्रणमा रहेका केही स्थानसहित कुल २८ क्षेत्रहरूको आधिकारिक नक्सामा मानक नाम राख्ने घोषणा गरेको थियो।
यस विषयमा प्रश्न गर्दा माओ निंगले भनिन्, ‘भारतको यो कदम अवैध र अमान्य छ र यसले चीन-भारत सीमाको पश्चिमी क्षेत्रका ती भूभागहरू सधैं चीनकै हुने वास्तविकतालाई परिवर्तन गर्न सक्दैन।’ चीनको आपत्तिपछि भारतको विदेश मन्त्रालयले पनि जवाफ दिएको छ। भारतको विदेश मन्त्रालयका प्रवक्ता रणधीर जयसवालले लद्दाखलाई भारतको अभिन्न र अविभाज्य हिस्सा भएको बताएका छन्। उनले प्रेस विज्ञप्तिमा भनेका छन्, ‘लद्दाख भारतको अभिन्न र अविभाज्य अङ्ग हो। चीनले अस्वीकार गरे पनि यो स्थापित तथ्यलाई परिवर्तन गर्न सक्दैन।’ भारत सरकारले अक्टोबर २ मा लद्दाखका २८ रणनीतिक तथा भौगोलिक स्थानहरूको आधिकारिक नाम निर्धारण गरेको थियो। सर्भे अफ इन्डियाको आधिकारिक नक्सामा ती स्थानहरूको सही पहिचान र जनमानसमा स्पष्टता ल्याउन यो कदम चालिएको भारतले स्पष्ट पारेको छ।
सम्बन्धित खबर
