हिमालय स्पोर्ट्सले नेपाल प्रिमियर लिग (एनपीएल) का खेलहरू अघि र पछि सञ्चालन हुने ‘रेड बुल क्रिकेट लाइभ इन एसोसिएसन विथ बजाज पल्सर’ कार्यक्रममा शोएब अख्तरलाई विशेष अतिथिको रूपमा सहभागिताका लागि अनुबन्ध गरेको छ। ‘रावलपिन्डी एक्सप्रेस’ उपनामले परिचित अख्तरले नेपालमा विशेष क्रिकेट प्रसारण कार्यक्रममा भाग लिन लागेका छन्।
अख्तरले २९ असोजमा सुरु हुने एनपीएलको तेस्रो संस्करणमा आफ्नो अन्तर्राष्ट्रिय क्रिकेट अनुभव, प्राविधिक पक्ष र नेपाली क्रिकेटको सम्भावनाबारे विश्लेषण गर्नेछन्। उनले सन् १९९७ देखि २०११ सम्म पाकिस्तान राष्ट्रिय टोलीका लागि खेल्दै ४६ टेस्ट खेलमा १७८ विकेट, १६३ एकदिवसीय खेलमा २४७ विकेट र १५ टी–२० मैचमा १९ विकेट लिएका छन्।
हिमालय स्पोर्ट्सका प्रमुख कार्यकारी अधिकृत सुरज गिरीले अख्तरको सहभागितालाई नेपाली खेल प्रसारण क्षेत्रमा महत्वपूर्ण उपलब्धि मानेका छन्। उनले यसलाई अन्तर्राष्ट्रिय क्रिकेटका चर्चित खेलाडीको अनुभव र विश्लेषण नेपाली दर्शकहरू माझ पुर्याउने अर्को महत्वपूर्ण कदमको रूपमा व्याख्या गरेका छन्। एनपीएलको तेस्रो संस्करण अक्टोबर २६ देखि नोभेम्बर २१ सम्म सञ्चालन गरिनेछ।
सम्बन्धित खबर
