नाडाद्वारा काठमाडौं जिल्ला प्रशासनलाई सामग्री सहयोग
काठमाडौं । नाडा अटोमोबाइल्स एसोसिएसन अफ नेपालले संस्थागत सामाजिक उत्तरदायित्वअन्तर्गत जिल्ला प्रशासन कार्यालय काठमाडौंलाई आवश्यक सामग्री हस्तान्तरण गरेको छ । बुधबार नाडाका अध्यक्ष सुरेन्द्रकुमार उप्रेती नेतृत्वको प्रतिनिधिमण्डलले प्रमुख जिल्ला अधिकारी ईश्वरराज पौडेलसँग भेट गरी सामग्री हस्तान्तरण गरेको हो । भेटमा नाडासँग सम्बन्धित समसामयिक विषयमा समेत छलफल भएको थियो ।
राष्ट्रिय विपत्ति तथा आपत्कालीन अवस्थामा सरकारी निकाय र विभिन्न संघसंस्थालाई आवश्यकताअनुसार सहयोग गर्दै आएको नाडाले जनाएको छ । यस्तो सहकार्यले सामाजिक उत्तरदायित्व निर्वाहसँगै सरकारी निकायसँगको समन्वय प्रभावकारी बनाउने संस्थाको विश्वास छ । कार्यक्रममा नाडाका उपाध्यक्ष विक्रम सिंघानिया, महासचिव मिलनबाबु मल्ल, सचिव मेघराज पौडेल तथा केन्द्रीय कार्यसमिति सदस्यहरू दीपककुमार अग्रवाल र नारायणप्रसाद पौडेल सहभागी थिए । नाडाले आगामी दिनमा पनि सामाजिक उत्तरदायित्वअन्तर्गत सहयोगात्मक तथा रचनात्मक गतिविधिलाई निरन्तरता दिने प्रतिबद्धता जनाएको छ ।
