अमेरिकी मध्यावधि चुनावपछि एआई विस्तारलाई लिएर लगानीकर्ताको चिन्ता बढ्दा विश्वभरका प्रमुख प्रविधि कम्पनीहरूको शेयर मूल्य भारी घटेको छ। नास्डाक कम्पोजिट ५.५ प्रतिशतभन्दा बढीले ओरालो लाग्दा अमेरिकी बजारको कुल मूल्य करिब २.५ ट्रिलियन डलरले घटेको डाउ जोन्सले जनाएको छ। अमेरिकामा एआई पूर्वाधार र डेटा सेन्टर विस्तार रोक्ने डेमोक्रेटिक एजेन्डापछि ट्रम्पले सामाजिक सञ्जालमा डेमोक्रेट्सलाई बजार गिरावटको जिम्मेवार ठहर्याएका छन्।
२० कात्तिक, काठमाडौं। अमेरिकी मध्यावधि चुनावपछि एआई प्रविधिको विस्तार र विकासलाई लिएर लगानीकर्ताको चिन्ता बढ्दा विश्वभरका प्रमुख प्रविधि कम्पनीहरूको शेयर मूल्यमा भारी गिरावट आएको छ। अमेरिका र एसियाका प्रमुख टेक कम्पनीहरूको बजार पुँजीकरणबाट सयौँ अर्ब डलर गुमेको छ। एआई प्रविधिको तीव्र विकासलाई नियन्त्रण वा सुस्त बनाउने पक्षमा रहेका डेमोक्रेटिक उम्मेदवारहरूले चुनावमा सफलता हासिल गरेपछि लगानीकर्ताहरू थप सशंकित बनेको हुनसक्ने अनुमान गरिएको छ।
विशेषगरी एआई सञ्चालनका लागि आवश्यक पर्ने डेटा सेन्टरको निर्माण र विस्तारमा प्रतिबन्ध लाग्न सक्ने आशंकाले प्रविधि क्षेत्रका कम्पनीहरूको शेयरमा दबाब परेको छ। टेक कम्पनीहरूको बाहुल्य रहेको अमेरिकी नास्डाक कम्पोजिट इन्डेक्स ५.५ प्रतिशतभन्दा बढीले घटेको छ। डाउ जोन्सको तथ्यांकअनुसार अमेरिकी शेयर बजारमा आएको यो गिरावटले कम्पनीहरूको कुल बजार मूल्यमा करिब २.५ ट्रिलियन डलरको क्षति पुर्याएको छ।
एसियाली बजारमा पनि अमेरिकी बजारमा आएको गिरावटको प्रभाव देखिएको छ। जापानको निक्केई २२५ सूचकांक सुरुवाती चरणमै ५ प्रतिशतभन्दा बढीले घटेको छ। जापानी प्रविधि कम्पनी पानासोनिकको शेयर मूल्य १० प्रतिशतभन्दा बढीले खस्किएको छ भने हिटाचीको शेयर करिब ८ प्रतिशतले घटेको छ। दक्षिण कोरियाको शेयर बजारमा पनि ठूलो गिरावट आएको छ। प्रमुख शेयर सूचकांक कोस्पी ८.५ प्रतिशतभन्दा बढीले ओरालो लागेको छ। चिप निर्माता कम्पनी एसके हाइनिक्सको शेयर मूल्य ११.५ प्रतिशतभन्दा बढीले घट्दा सामसुङको शेयर पनि करिब १० प्रतिशतले खस्किएको छ।
ट्रम्पले भने– ‘डेमोक्रेट्सका कारण शेयर बजार खस्कियो’ शेयर बजारमा आएको ऐतिहासिक गिरावटपछि अमेरिकी राष्ट्रपति डोनाल्ड ट्रम्पले मतदाता र डेमोक्रेटिक पार्टीप्रति आक्रोश व्यक्त गरेका छन्। उनले सामाजिक सञ्जाल ट्रुथ सोसलमार्फत शेयर बजारमा आएको गिरावटका लागि डेमोक्रेटिक उम्मेदवारहरूको चुनावी जितलाई जिम्मेवार ठहर्याएका छन्। ट्रम्पले डेमोक्रेट्सलाई व्यंग्यात्मक रूपमा ‘डुमोक्रेट्स’ भन्दै लेखेका छन्, ‘मंगलबार डुमोक्रेट्सले ठूलो जित हासिल गरेकाले आज शेयर बजार क्र्यास भयो। यस्तो देख्दा निकै दुःख लाग्छ। यसका लागि तपाईंहरूले आफूलाई मात्र दोष दिन सक्नुहुन्छ!’
सम्बन्धित खबर
