गैँडाकोटमा दिगो पर्यटनसम्बन्धी तालिम सम्पन्न, देशको १५८औँ पर्यटन क्लब गठन
गैँडाकोट । विद्यार्थीलाई पर्यटन शिक्षा, नेतृत्व विकास र स्थानीय गन्तव्य प्रवर्द्धनमा सहभागी गराउने उद्देश्यले आयोजित राष्ट्रिय दिगो पर्यटन क्लब (एनएसटीसी) को गण्डकी प्रदेशस्तरीय दुईदिने क्षमता अभिवृद्धि कार्यक्रम सम्पन्न भएको छ।
कात्तिक १९ र २० गते होटल इल्ला कम्फर्टमा भएको कार्यक्रममा १० विद्यालय तथा कलेजका प्रधानाध्यापक, शिक्षक, क्लब संयोजक र विद्यार्थी प्रतिनिधि सहभागी थिए। कार्यक्रममा गैँडाकोट नगरपालिकाका प्रमुख मदनभक्त अधिकारी तथा नगरपालिकाको शिक्षा इकाइका प्रतिनिधिको समेत उपस्थिति थियो।
टीआरटीआई, नेपाल पर्यटन बोर्ड र दिगो पर्यटन परियोजना (एसटीपी)/यूएनडीपीको साझेदारी तथा जीटीटीपी नेपाल र गैँडाकोट नगरपालिकाको सहकार्यमा कार्यक्रम आयोजना गरिएको हो।
कार्यक्रममा क्लब सञ्चालन, विद्यार्थी नेतृत्व विकास, दिगो पर्यटन, गन्तव्य प्रवर्द्धन र पर्यटन क्षेत्रमा युवाका अवसरबारे तालिम तथा अन्तरक्रिया गरिएको थियो। जीटीटीपी नेपालका निर्देशक एवं टीआरटीआईका अध्यक्ष मदनकुमार बराल र पर्यटन प्रशिक्षक प्रेमकुमार दनुवारले सहजीकरण गरेका थिए।
‘माई टुरिजम जर्नी’ सत्रमा पर्यटन विज्ञ डा. रामजी शर्मा, एनटीएचएमसीका प्रिन्सिपल प्रकाश रेग्मी र होटल इल्ला कम्फर्टका महाप्रबन्धक प्रदीप न्यौपानेले पर्यटन क्षेत्रका अनुभव, अवसर र चुनौतीबारे जानकारी दिएका थिए।
कार्यक्रमकै अवसरमा गैँडाकोट इङ्लिस स्कुलमा देशको १५८औँ राष्ट्रिय दिगो पर्यटन क्लब गठन गरिएको आयोजकले जनाएको छ। सहभागीहरूले मौलाकालिका मन्दिर र होटल इल्ला कम्फर्टको स्थलगत अवलोकनसमेत गरेका थिए।
अन्तिम सत्रमा ‘एनएसटीसी गण्डकी रोडम्याप २०२७’ तयार गर्नुका साथै गण्डकी घोषणापत्र जारी गरिएको छ। घोषणापत्रमा क्लबको नियमित सञ्चालन, संस्थागत सहकार्य, विद्यार्थी नेतृत्व विकास र समुदायमा आधारित दिगो पर्यटनलाई प्राथमिकता दिइएको छ।
कार्यक्रम निर्देशक सरोज प्याकुरेलले आगामी दिनमा गण्डकी प्रदेशका अन्य क्लबलाई समेटेर पोखरा वा अर्जुनचौपारी गाउँपालिकामा पनि क्षमता अभिवृद्धि कार्यक्रम सञ्चालन गरिने बताए।
एनएसटीसी अभियानले युवालाई पर्यटन, वातावरण तथा सम्पदा संरक्षण र स्थानीय गन्तव्य प्रवर्द्धनमा सहभागी गराउँदै जिम्मेवार पर्यटनका अभियन्ताका रूपमा विकास गर्ने लक्ष्य लिएको छ।
सम्बन्धित खबर
