छठपछि चरणबद्ध आन्दोलन गर्ने पत्रकार महासंघको निर्णय, प्रेस काउन्सिल अध्यादेश फिर्ता लिन माग

काठमाडौं । नेपाल पत्रकार महासंघले प्रेस तथा अभिव्यक्ति स्वतन्त्रता र पत्रकारका पेसागत अधिकारको संरक्षणका लागि छठपछि चरणबद्ध आन्दोलन गर्ने निर्णय गरेको छ। अध्यक्ष निर्मला शर्माको अध्यक्षतामा बिहीबार केन्द्रीय कार्यालयमा बसेको केन्द्रीय समितिको उपलब्ध बैठकले आठबुँदे निर्णय गर्दै आन्दोलनमा जाने निष्कर्ष निकालेको हो। बैठकले समाचार कक्षमै प्रहरी प्रवेश गरी पत्रकारमाथि धरपकड गरिएको घटनालाई समग्र पत्रकारिता क्षेत्रमाथिको प्रहार ठहर गरेको छ। महासंघले घटनाको स्वतन्त्र छानबिन गरी दोषीमाथि कारबाही गर्न माग गरेको छ।

सरोकारवालासँग छलफल नगरी एकपक्षीय रूपमा अघि बढाइएको प्रेस काउन्सिल ऐनसम्बन्धी अध्यादेश फिर्ता लिन सरकारसँग माग गर्ने निर्णय पनि बैठकले गरेको छ। उक्त अध्यादेश जारी नगर्न राष्ट्रपति रामचन्द्र पौडेलसमक्ष आग्रह गरिने महासंघले जनाएको छ। गोरखापत्रलगायत सरकारी तथा निजी सञ्चारमाध्यमबाट पत्रकारलाई जबरजस्ती निष्कासन गर्ने, पारिश्रमिक नदिने र चाडपर्व खर्चसमेत उपलब्ध नगराउने कार्यलाई महासंघले श्रम अधिकारको गम्भीर उल्लंघन भनेको छ।

लोककल्याणकारी विज्ञापनबापत पत्रपत्रिकाले पाउँदै आएको रकम कटौती गर्ने विषयमा प्रेस काउन्सिल नेपालको सिफारिसअनुसार अघि बढ्न सरकारलाई आग्रह गर्ने निर्णयसमेत भएको छ। प्रेस तथा अभिव्यक्ति स्वतन्त्रता र संविधानको संरक्षणका लागि शान्ति र लोकतन्त्रका लागि पेसागत सञ्जाल (पापड) लाई सक्रिय बनाउने महासंघको निर्णय छ। आफ्ना एजेन्डा संसदमा उठाउन सांसदहरूसँग बहस तथा पैरवी गर्ने र अन्तर्राष्ट्रिय समुदायको ध्यानाकर्षण गराउने पनि महासंघले जनाएको छ। बैठकका निर्णय सार्वजनिक गर्दै महासचिव रामप्रसाद दाहालले माग सम्बोधन गराउन छठपछि चरणबद्ध आन्दोलनका कार्यक्रम सञ्चालन गरिने जानकारी दिए।