डा. बाबुराम भट्टराई: शनिबार र आइतबार बिदा दिने निर्णय वैज्ञानिक छ, स्थायी रूपमा लागू गरौं

२२ चैत, काठमाडौं । पूर्वप्रधानमन्त्री डा. बाबुराम भट्टराईले शनिबार र आइतबार बिदा दिने सरकारको निर्णयको समर्थन गरेका छन्। पेट्रोलियम पदार्थको अभावलाई मध्यनजर गर्दै आजको मन्त्रिपरिषद् बैठकले हप्तामा दुई दिन (शनिबार र आइतबार) सार्वजनिक बिदा दिने निर्णय गरेको थियो। सरकारको यो निर्णयप्रति फेसबुकमा प्रतिक्रिया दिँदै भट्टराईले यसलाई वैज्ञानिक भनेर स्थायी रूपमा लागू गर्न उपयुक्त रहेको बताएका छन्।

‘कार्यालय समय बिहान ९ बजेदेखि साँझ ५ बजेसम्म र शनिबार–आइतबार बिदा गर्ने वर्तमान सरकारी निर्णय वैज्ञानिक र उचित छ,’ भट्टराईले लेखेका छन्, ‘यसलाई केवल पेट्रोलियम पदार्थको अभावका कारण अस्थायी रूपमा मात्र होइन, सार्वजनिक वार्षिक बिदा र पात्रोमा समेत समयानुकूल सुधार गरेर स्थायी रूपमा लागू गर्नु सबै हिसाबले लाभदायक र उपयोगी हुन्छ।’

उनले आफ्नो कार्यकालको मन्त्रिपरिषद्ले यस विषयमा निर्णय गरिसकेको तर विविध कारणले लागू गर्न नसकेको बताएका छन्। ‘पछिल्ला सरकारहरूले यसलाई बेवास्ता गरे पनि अहिलेको सरकारले आवश्यक संशोधन गरेर लागू गर्नुपर्छ,’ उनले भने। उनले दैनिक कार्यसमय विस्तार गरेर हप्तामा दुई दिन बिदा दिएर कुल कार्यसमय कम नहुने उल्टो बढ्ने बताएका छन्।

‘यसले कर्मचारी र श्रमिकहरूको कार्यक्षमता वृद्धि गर्नेछ, पारिवारिक सुख–शान्ति बढ्नेछ, इन्धनको बचत हुनेछ, सफा वातावरण निर्माणमा मद्दत पुग्नेछ,’ उनले बताए, ‘आन्तरिक पर्यटन वृद्धि हुनेछ।’ आइतबारको बिदाले अन्तर्राष्ट्रिय कार्यसमयसँग व्यावसायिक तालमेल गर्न सहज हुने उनको तर्क छ। यसले देश र समाजका लागि सबै दृष्टिले फाइदाजनक हुने डा. भट्टराईले उल्लेख गरेका छन्।