२८ चैत, सप्तरी। सप्तरीको हनुमाननगर कंकालिनी नगरपालिकाको विशेष नगरसभा शुक्रबार सम्पन्न भएको छ। सभाले एक महत्वपूर्ण निर्णय गर्दै हाल सञ्चालनमा रहेको नगर कार्यपालिकाको कार्यालयलाई अस्थायी रूपमा स्थानान्तरण गर्ने निर्णय गरेको छ। नगरसभामा प्रस्तुत प्रस्तावमाथि छलफल गरिँदै कोशी तटबन्ध क्षेत्रअन्तर्गत भारत सरकारको स्वामित्वमा रहेको भवनमा सञ्चालन भइरहेका कार्यालयले वर्षाका कारण असर पारेको निष्कर्ष निकालिएको छ।
वर्षाका कारण भवनमा पानी भित्रिएकोले महत्वपूर्ण कागजात तथा सार्वजनिक सम्पत्तिमा क्षति पुग्ने जोखिम बढेको र दैनिक सेवा प्रवाहमा पनि अवरोध आएको उल्लेख गरिएको छ। साथै, कर्मचारीहरूले नियमित रूपमा कार्यालय सञ्चालन गर्न कठिनाइ भोगिरहेको मुख्य प्रशासकीय अधिकृत रमेशकुमार यादवले जानकारी दिएका छन्। यी परिस्थितिहरूलाई ध्यानमा राख्दै नगरसभाले वडा नं. ५ र ७ को सीमामा हालै निर्माण सम्पन्न भएको पशु भेटेरिनरी अस्पतालको नयाँ भवनमा नगर कार्यपालिकाको कार्यालय अस्थायी रूपमा सार्ने निर्णय गरेको छ।
उक्त भवन नेपाल सरकारको जग्गामा निर्माण गरिएको र आवश्यक कोठा तथा संरचना व्यवस्थित भएपछि सेवा निरन्तरता सुनिश्चित गरिने विश्वास गरिएको छ। नगरपालिकाको आफ्नै स्थायी प्रशासनिक भवन निर्माण र व्यवस्थापन नभएसम्म उक्त भवनबाट सबै कामकाज सञ्चालन गर्ने निर्णय नगरसभाले स्वीकृत गरेको छ। यस निर्णयले सेवा प्रवाहमा प्रभावकारिता ल्याउने र नागरिकलाई सहज सेवा उपलब्ध गराउने अपेक्षा नगरपालिकाले राखेको छ।
