लुम्बिनी प्रदेश जय ट्रफी क्रिकेटमा छनोट, गण्डकी प्रदेश नेट रनरेटमा पछि परेर बाहिरियो

लुम्बिनी प्रदेश जय ट्रफी क्रिकेट प्रतियोगितामा नेट रनरेटको आधारमा शीर्ष ६ मा स्थान बनाउन सफल भएको छ। नेपाल पुलिस क्लब र गण्डकी प्रदेशसँग समान ९ अंक भए तापनि गण्डकी प्रदेश नेट रनरेटमा पछि परेर बाहिरिएको छ। आर्मीले लुम्बिनीलाई १ विकेटले पराजित गरेको खेलमा कुशल मल्लले ४ विकेट लिए। २ वैशाख, काठमाडौं। लुम्बिनी प्रदेश जय ट्रफी क्रिकेटका लागि छनोट भएको छ। बुधबार आर्मीविरुद्धको खेलमा १ विकेटले पराजित भए तापनि लुम्बिनी शीर्ष ६ मा पर्न सफल भएको छ। लुम्बिनीसहित नेपाल पुलिस क्लब र गण्डकी प्रदेशसँग समान ९ अंक भए तापनि नेट रनरेटमा गण्डकी पछि परेको छ। यदि लुम्बिनीले आर्मीसँगको खेल जितेको भए उनीहरु स्वतः छनोट हुने थिए, तर पराजित भए पनि नेट रनरेटका आधारमा छैटौं स्थानमा पुग्न निश्चित भएको हो। गण्डकी प्रदेश भने नेट रनरेटमा पछि परेर सातौं स्थानमा सीमित भएको छ। गण्डकीको पनि ९ खेलमा ९ अंक भए पनि नेट रनरेट -०.१०७ रहेको छ। लुम्बिनीको नेट रनरेट माइनस नजाने कुरा पहिलेनै सुनिश्चित भइसकेको थियो। मधेश प्रदेशसँगको खेलमा नेपाल पुलिस क्लब पराजित भए पनि पुलिसको नेट रनरेट उच्च रहेको छ। मधेशले पुलिसलाई पराजित गरेपछि ११ अंक जोडेको छ। खेलमा लुम्बिनीले दिएको १३९ रनको लक्ष्य पछ्याएको आर्मीले २५.२ ओभरमा ९ विकेट गुमाएर लक्ष्य पूरा गर्‍यो। आर्मीका लागि कुशल मल्लले सर्वाधिक ४१ रन बनाए भने अर्जुन साउदले २८ रन जोडे। भीम सार्कीले १८ रन बनाएका थिए। पहिले टस जितेर ब्याटिङ गरेका लुम्बिनीले ३९.२ ओभरमा अलआउट हुँदै १३८ रन बनाएको थियो। रन्जित खड्काले सर्वाधिक २३ रन बनाए भने कप्तान देव खनालले पनि २३ रन जोडे। आकाश त्रिपाठीले २१ रन बनाए। आर्मीका लागि कुशल मल्लले ४ विकेट लिए भने नरेन साउद र भीम सार्कीले २-२ विकेट लिए। त्यस्तै शाहब आलम र बसिर अहमदले १-१ विकेट लिए।