‘जेम्स बण्ड’ को नयाँ फिल्म बन्ने, नयाँ जासूस नायक को हुने?

अमेजन एमजीएम स्टुडियोले नयाँ जेम्स बण्ड फिल्म निर्देशनका लागि डेनिस भिलेनुभलाई चयन गरेको छ। फिल्म प्रमुख कोर्टनी भ्यालेन्टीले नयाँ बण्डको घोषणा कहिले हुने भन्ने विषयमा ‘धेरै उत्साहित नहुनुहोस्’ भन्दै सचेत गराएकी छिन्। नयाँ बण्डको भूमिकाका लागि जेकब एलोर्डी, क्यालम टर्नर र लुइस पाट्र्रिज चर्चामा छन्, तर अन्तिम निर्णय अझै बाकी छ। जेम्स बण्ड फेरि फर्कनेछन्, तर कहिले भन्ने कुरा अझै स्पष्ट छैन।

अमेजन एमजीएम स्टुडियोले आगामी फिल्मबारे छोटो जानकारी सार्वजनिक गरेको छ। जासुसी फ्रेन्चाइजको सिर्जनात्मक नियन्त्रण हालसालै आफ्नो हातमा लिएपछि स्टुडियोले नयाँ श्रृंखला निर्देशनका लागि डेनिस भिलेनुभलाई चयन गरेको हो। ‘ड्युन’ जस्ता सफल फिल्मका निर्देशक भिलेनुभको चयनलाई सकारात्मक रूपमा हेरिएको छ। साथै, ‘पीकी ब्लाइन्डर्स’ का निर्माता स्टिभन नाइटलाई पटकथा लेखनको जिम्मेवारी दिइएको छ। अब भिलेनुभसँगै निर्माता एमी पास्कल र डेभिड हेयम्यानको अगाडि सबैभन्दा ठूलो चुनौती नयाँ जेम्स बण्डको भूमिका निर्वाह गर्न सक्ने कलाकार छनोट गर्नु हो।

तर, सिनेमाको कार्यक्रममा स्टुडियोले आफ्नो आगामी फिल्म सूची प्रस्तुत गर्दा बण्डको भूमिका को पाइने भन्ने विषयमा कुनै संकेत दिएका छैनन्। अमेजन एमजीएम स्टुडियोकी फिल्म प्रमुख कोर्टनी भ्यालेन्टीले भनिन्, ‘तपाईंहरू सबैलाई कहिले नयाँ जेम्स बण्ड घोषणा हुनेछ भन्ने चासो छ भन्ने मलाई थाहा छ। तर धेरै उत्साहित नहुनुहोस्। हामी यो काम निकै सावधानी र सम्मानका साथ गर्दैछौं। यो हाम्रो जीवनकै ठूलो सपना हो, र हामी यसलाई हल्का रुपमा लिने अवस्थामा छैनौं।’

नयाँ बण्डको भूमिकाका लागि को आउने भन्ने विषयमा चर्चा जोसमा छ। जेकब एलोर्डी, क्यालम टर्नर र लुइस पाट्र्रिज जस्ता कलाकारहरूको नाम चर्चामा छ। तर जो कोही चयन भए पनि, उनीहरूले ठूलो जिम्मेवारी वहन गर्नुपर्नेछ। अघिल्लो जेम्स बण्डको रुपमा ड्यानियल क्रेगलाई इतिहासकै उत्कृष्ट बण्डमध्ये एक मानिन्छ, सीन कोनेरिसँगै। ‘क्यासिनो रोयाल’ र ‘स्काइफल’ जस्ता फिल्मोंले श्रृंखलालाई नयाँ उचाइमा पुर्याएका थिए। उनले सन् २०२१ को ‘नो टाइम टु डाइ’ पछि बण्डको भूमिका नगर्ने निर्णय गरिसकेका छन्।

अमेजनका लागि ‘बण्ड २६’ सफल बनाउनु अत्यन्तै महत्वपूर्ण छ। सन् २०२२ मा एमजीएम स्टुडियो खरिद गर्न कम्पनीले ८ अर्ब डलरभन्दा बढी खर्च गर्यो, जसको मुख्य कारण नै यो फ्रेन्चाइज हो। त्यसैले, नयाँ फिल्मले ‘गोल्डफिङ्गर’ जस्तो स्तर हासिल गर्ने अपेक्षा गरिएको छ, ‘ए भ्यु टु अ किल’ जस्तो होइन।