अमेरिकी राष्ट्रपति डोनाल्ड ट्रम्पले इरान युद्ध छिट्टै नै अन्त्य हुने दाबी गरेका छन्। नभाडामा कर दिवसको छलफलका क्रममा युद्ध सम्बन्धी छोटो टिप्पणी गर्दै ट्रम्पले भने, “यो धेरै छिट्टै नै सकिनु पर्छ।” उनले यसबारे थप व्याख्या नगरे पनि युद्ध राम्रोसँग अघि बढिरहेको बताएका छन्। ट्रम्पले अमेरिकी सेनाले रकेट आक्रमण गरेको भन्दै प्रशंसा समेत गरेका छन्। गत सप्ताहान्तमा अमेरिका र इरानबीच इस्लामाबादमा भएको वार्ता असफल भएको थियो। यद्यपि पाकिस्तान लगायतका मध्यस्थकर्ताहरूले दोस्रो चरणको वार्ताका लागि पहल गरिरहेका छन्। ह्वाइट हाउसले सम्भावित दोस्रो चरणको शान्ति वार्ताका बारेमा छलफल भइरहेको तर मिति र स्थान तय नभएको जनाएको छ।
इजरायल र लेबननबीच १० दिने युद्धविराम सम्झौता कार्यान्वयनमा आएको छ। अमेरिकाले भने यस युद्धविराम धेरै समयसम्म रहन सक्ने जनाएको छ। इजरायली प्रधानमन्त्री बेन्जामिन नेतन्याहूले लेबननसँग “ऐतिहासिक सम्झौताको लागि” यसले अवसर प्रदान गर्ने आशा व्यक्त गरेका छन्। इरान समर्थित हिज्बुल्लाहले पनि युद्धविराम सम्झौता पालना गर्ने पुष्टि गरेको छ। उक्त लडाकु समूहले लेबननको भूमिमा आक्रमण रोक्ने र इजरायल सेना पनि उक्त भूमिमा गतिविधि बन्द गर्ने सर्तमा सहमति गर्नुपर्ने बताएका छन्।
इजरायली प्रधानमन्त्री नेतन्याहूले भनेका छन् कि आफ्नो देशको फौज दक्षिणी लेबननको १० किलोमिटर भित्र “सुरक्षा क्षेत्र” भित्र सीमित हुनेछन्। यो अडानलाई हिज्बुल्लाहले आफ्नो माग विपरीत भनेको छ। अमेरिकी विदेश मन्त्रालयले भनेको छ कि सम्झौता अनुसार लेबनन सरकारले हिज्बुल्लाबाट इजरायलमा हुने आक्रमण रोक्न “अर्थपूर्ण कदम चाल्नुपर्ने” हुन्छ। युद्धविराम लागु भएसँगै इजरायल डिफेन्स फोर्सेस (आईडीएफ)ले जारी गरेको विज्ञप्तिमा पछिल्लो २४ घण्टामा हिज्बुल्लाहका ३८० निशानामा आक्रमण गरिएको जनाएको छ।
लेबनन सेनाले भनेको छ कि उनीहरूको ग्रामीण क्षेत्रमा अझै इजरायली आक्रमण जारी रहेको र यसका कारण युद्धविराम उल्लङ्घन भएको छ। अमेरिकी राष्ट्रपति ट्रम्पले हिज्बुल्लाहलाई पनि युद्धविराम पालना गर्न आह्वान गरेका छन्। उनले इजरायल र लेबननका नेताहरूलाई ह्वाइट हाउसमा बोलाएको बताएका छन्। तर अब के हुनेछ भन्ने विषय अझै खुल्न बाँकी छ।
इजरायल र लेबननबीच युद्धविराम लागु भएसँगै शुक्रबार एशियाली बजारमा तेलको मूल्य घटेको छ। तेलको मूल्यमा विश्वसामान्य ‘ब्रेन्ट’ कच्चा तेलको मूल्य करिब एक प्रतिशतले घटेर ९८.५० अमेरिकी डलरमा कारोबार भएको छ। अमेरिकाबाट व्यापार हुने तेलको मूल्य पनि घटेको छ।
