कांग्रेसले लिडरसिप एकेडेमी सञ्चालन गर्ने, जनप्रतिनिधि हुन कक्षा पूरा गर्न अनिवार्य

८ वैशाख, काठमाडौं । नेपाली कांग्रेसले पार्टीभित्र तथा सार्वजनिक नेतृत्व विकासलाई सशक्त बनाउने उद्देश्यले ‘कांग्रेस लिडरसिप एकेडेमी’ स्थापना गर्ने निर्णय गरेको छ। पार्टीको केन्द्रीय नीति अनुसन्धान तथा प्रशिक्षण प्रतिष्ठानको अधीनमा गठन हुने यो एकेडेमीलाई कांग्रेसले ‘ट्रेनिङ इन्स्टिच्युट’को रूपमा परिभाषित गरेको छ। यसले पार्टीका क्रियाशील सदस्यहरूलाई कांग्रेसको इतिहास, आदर्श, विचारधारा, आर्थिक नीति, विकास नीति र सामाजिक नीतिबारे प्रशिक्षण प्रदान गर्नेछ। क्रियाशील सदस्यता नवीकरण गर्ने कार्यकर्ताहरूलाई पार्टीको नीति, कार्यक्रम, प्राथमिकता तथा नवीनतम नीतिगत विषयहरूबारे नियमित पुनःताजगी तालिम प्रदान गर्ने कांग्रेसको योजना छ।

एकेडेमीले पार्टीतर्फबाट निर्वाचित स्थानीय, प्रदेश र संघीय जनप्रतिनिधिहरूलाई पनि अनुशिक्षण कार्यक्रम सञ्चालन गर्नेछ। आगामी निर्वाचनहरूमा जनप्रतिनिधि बन्न इच्छुक पार्टी कार्यकर्ताहरुलाई आधारभूत र विषयगत ज्ञान, सीप तथा नेतृत्व विकास सम्बन्धी विशिष्ट कक्षा सञ्चालन गरिने व्यवस्था गरिएको छ। ‘नेतृत्वमा जान चाहने आकांक्षीहरूलाई ज्ञान, कौशलता, व्यवस्थापकीय क्षमता र समग्र रूपमा सम्पन्न बनाउन हाम्रो लक्ष्य हो,’ कांग्रेसका प्रवक्ता देवराज चालिसेले उल्लेख गरे।

महामन्त्री प्रदीप पौडेलले एकेडेमीलाई राज्य प्रणालीबारे कार्यकर्तालाई सशक्त बनाउने महत्वपूर्ण प्रगतिका रूपमा व्याख्या गरे। उनले भने, ‘राज्य प्रणाली, संवैधानिक व्यवस्था, विभिन्न तहको सरकारको जिम्मेवारी र प्रशासनिक क्षमता सम्बन्धी जानकारी दिन यो प्रशिक्षण संस्था सञ्चालनमा ल्याइएको हो।’ महामन्त्री पौडेलका अनुसार सार्वजनिक जिम्मेवारीमा जान चाहनेले निर्वाचनभन्दा कम्तीमा तीन महिनाअघि अनिवार्य रूपमा ‘पब्लिक पोलिसी’को कक्षा पूरा गर्नुपर्ने व्यवस्था गरिएको छ। एकेडेमीमार्फत निर्धारित कक्षा पूरा गरेको आधारमा नै पार्टीको उम्मेदवारी छनोट तथा अन्य जिम्मेवारीहरूमा प्रत्यक्ष प्रभाव पर्नेछ।

प्रवक्ता चालिसेले एकेडेमीलाई ‘स्कुल’को संज्ञा दिए। उनले भने, ‘एकेडेमीको आफ्नै पाठ्यक्रम हुन्छ र यो तीन महिनाको कोर्स हो।’ चालिसेले पूर्ण रूपमा कोर्स पूरा नगरेका कार्यकर्ता उम्मेदवारका लागि मान्य नहुने स्पष्ट पारे। ‘कोर्स पूरा नगरेका उम्मेदवार मान्य हुँदैनन्,’ उनले भने, ‘हाम्रो उद्देश्य राजनीतिक पारदर्शिता र मेरिटोक्रेसी स्थापित गर्नु हो।’ कांग्रेसले एकेडेमीलाई पार्टीको दीर्घकालीन क्षमता विकासका लागि महत्वपूर्ण पूर्वाधारको रूपमा हेरिरहेको छ।