रेडबुल दशौं पीएम कप एनभीए महिला भलिबल लिग २०८३ मा नेपाल पुलिस क्लब र नेपाल एपीएफ क्लबले विजयी सुरुवात गरेका छन्। महिलातर्फ पुलिसले एभरेस्ट भलिबल क्लबलाई ३-० ले पराजित गरेको छ र उषा भण्डारीलाई प्लेयर अफ दि म्याच घोषणा गरिएको छ। एपीएफले त्रिभुवन आर्मी क्लबलाई ३-१ को सेटमा हराएको छ र महिलातर्फ उत्कृष्ट ६ टोलीले सिंगल राउण्ड रोविन प्रणालीमा प्रतिस्पर्धा गर्नेछन्। १० वैशाख, काठमाडौं।
रेडबुल दशौं पीएम कप एनभीए महिला तथा पुरुष भलिबल लिग २०८३ मा महिलातर्फ दुई विभागीय टोली नेपाल पुलिस क्लब र नेपाल एपीएफ क्लबले विजयी सुरुवात गरेका छन्। त्रिपुरेश्वरस्थित दशरथ रंगशालाको कभर्डहलमा बिहीबारदेखि सुरु भएको लिगमा पछिल्लो विजेता समेत रहेको पुलिसले बुटवलको एभरेस्ट भलिबल क्लबलाई सोझै सेटमा पराजित गर्यो। प्रतिस्पर्धात्मक पहिलो सेट टाइब्रेकरमा २६-२४ ले पुलिसको पक्षमा रह्यो भने त्यसपछि दुई सेट २५-१६ र २५-१७ को सहज जित भयो। पुलिसकी उषा भण्डारी खेलको प्लेयर अफ दि म्याच चयन गरिइन्।
त्यसैगरी महिलातर्फ बिहीबार बिहान भएको पहिलो खेलमा एपीएफले अर्को विभागीय टोली त्रिभुवन आर्मी क्लबलाई ३-१ को सेटमा हरायो। प्रतिस्पर्धात्मक बनेको पहिलो सेट एपीएफले २५-२३ ले जितेर खेलमा अग्रता लिएको थियो। तर आर्मीले दोस्रो सेट २५-१७ को स्कोरमा लिँदै खेललाई १-१ को स्तरमा पुर्यायो। त्यसपछि एपीएफले तेस्रो र चौथो सेट समान २५-१९ को स्कोरमा जित्दै खेल जित्यो। एनभीए लिगमा महिलातर्फ उत्कृष्ट ६ टोलीले सिंगल राउण्ड रोविन प्रणालीमा प्रतिस्पर्धा गर्नेछन् भने पुरुषतर्फ उत्कृष्ट ८ टोली सहभागी छन्। पुरुषतर्फ पनि बिहीबार दुई खेलहरू हुनेछन्।
