११ वैशाख, काठमाडौं । अहिलेको तीव्र गर्मीबाट आराम पाउन अझै केही दिन पर्खनु पर्ने भएको छ। जल तथा मौसम विज्ञान विभागका अनुसार आगामी सातादेखि मात्र वर्षाको गतिविधि सुरु हुनेछ। त्यसअघिसम्म तातो हावाको लहर चल्ने भएकाले सतर्क रहन विभागका मौसमविदहरूले सुझाव दिएका छन्। विभागले देशका विभिन्न क्षेत्रमा बढ्दो गर्मीलाई मध्यनजर गरी आज साँझ विशेष बुलेटिन जारी गरेको छ। पछिल्ला केही दिनदेखि मधेशसहित बागमती, गण्डकी, लुम्बिनी, कर्णाली र सुदूरपश्चिम प्रदेशका तराई तथा उपत्यकामा तापक्रम उच्च बनेको छ। लुम्बिनी र सुदूरपश्चिम प्रदेशका तराई क्षेत्रमा तातो लहर (हिट वेभ) को अवस्था देखिएको छ।
विभागले आगामी तीन दिनसम्म लुम्बिनी र सुदूरपश्चिम प्रदेशका धेरैजसो तराई क्षेत्रहरूमा अधिकतम तापक्रम ४० डिग्री सेल्सियस वा तल्लो भन्दा माथि पुग्न सक्ने चेतावनी दिएको छ। मध्यस्तरको तातो लहरको जोखिम जारी रहेकाले सर्वसाधारणलाई आवश्यक सतर्कता अपनाउन आग्रह गरिन्छ। बुलेटिनअनुसार कञ्चनपुर, कैलाली, डोटी, बर्दिया, बाँके र सुर्खेत जिल्लालाई ‘सतर्क रहनुपर्ने’ श्रेणीमा राखिएको छ। त्यस्तै, डडेलधुरा, अछाम, दैलेख, सल्यान, रोल्पा, प्युठान, दाङ, कपिलवस्तु, रुपन्देही, अर्घाखाँची, पाल्पा र परासी जिल्लाहरु पनि सतर्क रहनुपर्ने सूचीमा समावेश गरिएका छन्।
विभागले अत्यधिक गर्मीले स्वास्थ्यमा असर पार्न सक्ने भएकाले दिउँसोको समयमा अनावश्यक रूपमा बाहिर ननिस्कन, प्रशस्त पानी पिउन, हलुका कपडा लगाउन र संवेदनशील समूहहरू (बालबालिका, वृद्ध तथा बिरामी) लाई विशेष ध्यान दिनु पर्ने बताएको छ। तर, आउँदो हप्ताको सुरुवातदेखि मधेश, बागमती र गण्डकी प्रदेशका तराईका केही स्थानमा वर्षाको गतिविधि देखिन थालेपछि तापक्रममा केही कमी आउने र शीतलता महसुस हुनेछ। विभागकी मौसमविद् बिनु महर्जनले भनिन्, “आउँदो साता मध्यम वर्षा हुने सम्भावना छ, जसले गर्दा गर्मी केही कम हुनेछ।”
