ऊर्जा, जलस्रोत तथा सिँचाइ मन्त्रालयले आगामी १० वर्षभित्र २४ हजार ५ सय मेगावाट विद्युत् उत्पादन गर्ने ‘विद्युत् खपत वृद्धि तथा ऊर्जा निर्यात रणनीति २०८३’ सार्वजनिक गरेको छ। यस रणनीतिमा सबै घरधुरीमा विद्युतीकरण गर्नेमात्र नभई, प्रसारण र वितरण प्रणालीमा सुधार गर्दै विद्युत् निर्यात प्रवर्द्धन गर्ने दीर्घकालीन योजना पनि समावेश गरिएको छ। सरकारले सार्वजनिक यातायातमा विद्युतीय सवारीसाधनलाई प्राथमिकता दिने, एलपी ग्यासको प्रयोग घटाउने तथा कोइला र पेट्रोलियम आधारित बाइलरलाई विद्युतीय प्रणालीले प्रतिस्थापन गर्ने लक्ष्य राखेको छ।
११ वैशाख, काठमाडौं। ऊर्जा, जलस्रोत तथा सिँचाइ मन्त्रालयले ‘विद्युत् खपत वृद्धि तथा ऊर्जा निर्यात रणनीति २०८३’ सार्वजनिक गरेको छ। यो रणनीति ऊर्जा क्षेत्रलाई आर्थिक रूपान्तरणको प्रमुख आधार बनाउन निर्मित गरिएको हो। मन्त्रालयका सहसचिव सन्दीप कुमार देवको संयोजकत्वमा गठन गरिएको समितिले तयार पारेको यो रणनीति ऊर्जा मन्त्री विराजभक्त श्रेष्ठले पारित गरेपछि सार्वजनिक गरिएको हो।
रणनीतिले विद्युत्को आन्तरिक खपतलाई उल्लेखनीय रूपमा वृद्धि गर्नेमा जोड दिँदै, खपतपछि बचत भएको विद्युत् निर्यात प्रवर्द्धन गर्ने दीर्घकालीन मार्गचित्र प्रस्तुत गरेको छ। शतप्रतिशत घरधुरीमा विद्युतीकरण गर्ने र प्रसारण तथा वितरण प्रणालीमा व्यापक सुधार ल्याउने कुरामा पनि रणनीतिले विशेष जोड दिएको छ। यो योजनाअनुसार आगामी १० वर्षभित्र २४ हजार ५ सय मेगावाट विद्युत् उत्पादन गर्ने लक्ष्य राखिएको छ।
सरकारले विद्युतीय घरायसी उपकरणहरूको प्रयोगलाई थप आकर्षक बनाउन, मिटर र ट्रान्सफर्मर क्षमतामा सुधार गर्दै एलपी ग्यासको प्रयोग क्रमशः घटाउने नीति अवलम्बन गरेको छ। हाल प्रतिव्यक्ति ऊर्जा खपत करिब ४५० किलोवाट आवर रहेकोछ भने आगामी १० वर्षभित्र यसलाई १ हजार ५ सय किलोवाट आवर पुर्याउने लक्ष्य रहेको रणनीतिमा उल्लेख छ।
