सरकारले उपत्यकाका अव्यवस्थित बस्तीहरू हटाउँदै भूमिहीन र सुकुमवासीहरूको स्क्रिनिङ गरिरहेको छ। त्रिपुरेश्वरस्थित दशरथ रंगशालामा स्थापना गरिएको डेस्कमार्फत वास्तविक सुकुमवासीहरूको पहिचान भइरहेको छ। स्वास्थ्यकर्मीको टोलीले शारीरिक, मानसिक स्वास्थ्य सेवा र मनोसामाजिक परामर्श प्रदान गरिरहेको छ। १३ वैशाख, काठमाडौं।
सरकारले उपत्यकाका विभिन्न अव्यवस्थित बस्तीहरू हटाएसँगै भूमिहीन र सुकुमवासीहरूको स्क्रिनिङ थालनी गरेको छ। शनिबार बिहानदेखि नदी किनारमा रहेका सुकुमवासी बस्तीहरू खाली गरिएका हुन्। यस क्रममा त्रिपुरेश्वरस्थित दशरथ रंगशालामा डेस्क स्थापना गरी सरकारले वास्तविक सुकुमवासीहरूको पहिचान गरिरहेको छ। रंगशाला पुगेका सुकुमवासीहरूलाई स्वास्थ्यकर्मीको टोलीले शारीरिक र मानसिक स्वास्थ्य सेवा प्रदान गरिरहेका छन्।
काठमाडौं महानगरपालिकाले स्वास्थ्यकर्मीहरूको टोली परिचालन गरेर स्वास्थ्य परीक्षण गरिरहेको प्रधानमन्त्री तथा मन्त्रिपरिषद् कार्यालयले जनाएको छ। अहिलेसम्म कम रक्तचाप भएका ४ जना पुरुष र २ जना महिला गरी ६ जनालाई सेवा दिइएको छ। त्यस्तै, ढाड र जोर्नी दुखाइ भएका २ जना पुरुष, टाउको दुखाइ भएका १८ जना पुरुष र ६ जना महिला, गर्भवती २ जना, काटेर चोटपटक लागेका १ जना तथा विभिन्न अन्य समस्या भएका १२ जनालाई स्वास्थ्य सेवा प्रदान गरिएको छ।
मनोसामाजिक परामर्शका लागि बहुविवाह गर्ने, पिता नभएका महिला, विद्यालय उमेरका बालबालिका र रोजगारमा रहेका अभिभावकहरूले आफूलाई परेको मानसिक समस्यामा परामर्श लिएका छन्। पारिवारिक र रोजगारी सम्बन्धी चिन्ता तथा मानसिक तनाव, बालबालिकाको शिक्षालाई निरन्तरता दिने कसरी भन्ने जस्ता विषयमा धेरै चिन्ता देखिएको छ, स्वास्थ्य विभागका महामारी रोग रोकथाम तथा नियन्त्रण कार्यक्रमका फोकल पर्सन ऋषिप्रसाद भुसालले जानकारी दिए।
