१७ वैशाख, काठमाडौं । पश्चिम नवलपरासीमा पुरानो विवादका कारण भएको कुटपिटमा संलग्नलाई पक्राउ गर्न गएको प्रहरी टोलीमाथि आक्रमण भएको छ। जिल्ला प्रहरी कार्यालय पश्चिम नवलपरासीका प्रवक्ता डीएसपी वीरदत्त पन्तले जानकारी दिनुभयो कि सो घटनामा नेपाल प्रहरी र सशस्त्र प्रहरीका एक–एक गाडीमा तोडफोड भएको छ।
आज दिउँसो एक बजेपछि पश्चिम नवलपरासीको प्रतापपुर गाउँपालिका–४ हरकपुरामा पुरानो रिसिबीको कारण २० वर्षीय उमेश केवटमाथि कुटपिट भएको थियो। उक्त घटनामा १७ वर्षीय अब्दुल अन्सारी र १७ वर्षकै आजात अन्सारी संलग्न रहेको प्रहरीलाई सूचित गरिएको थियो। सोही सूचनाका आधारमा प्रहरी टोली उनीहरूलाई पक्राउ गर्न पुगेको थियो।
सो क्रममा प्रहरीले ती दुई जनासहित घटनामा संलग्न अर्को ४३ वर्षीय सलामुदिन मियाँलाई पनि पक्राउ गरेको थियो। प्रहरीले उनीहरूलाई पक्राउ गरेपछि करिब २०० जनाको भिड जम्मा भई प्रहरीका गाडीमाथि ढुंगामुडा गरेको जनाएको छ। डीएसपी पन्तका अनुसार केहीबेरपछि प्रहरीले अवस्था नियन्त्रणमा लिएर पक्राउ परेकाहरूलाई हिरासतमा राखेको छ।
