बिहारका मुख्यमन्त्री सम्राट चौधरीले भने– श्यामाप्रसाद जन्मिएका बंगाल हाम्रो भूमि हो

२१ वैशाख, काठमाडौं । पश्चिम बंगाल विधानसभा निर्वाचनको मतगणनामा भारतीय जनता पार्टी (भाजपा) ले अग्रता कायम गरेपछि बिहारका मुख्यमन्त्री सम्राट चौधरीले आफ्नो खुशी व्यक्त गरेका छन्। ‘एक्स’ माध्यमबाट आफ्नो धारणा सार्वजनिक गर्दै उनले बंगालका जनतालाई ‘जागरुक र राष्ट्रनिष्ठ’ को रूपमा सम्मान गरेका छन्। ‘जहाँ श्यामाप्रसाद मुखर्जी जन्मिएका थिए, त्यो बंगाल हाम्रो हो,’ चौधरीले उल्लेख गरेका छन्, ‘पश्चिम बंगाल विधानसभा निर्वाचनमा भारतीय जनता पार्टीलाई ऐतिहासिक जनादेश दिनुभएकोमा बंगालका जागरुक र राष्ट्रनिष्ठ जनतालाई हृदयदेखि नै अनन्त शुभकामना।’

डा. श्यामाप्रसाद मुखर्जी भारतीय राजनीतिका एक प्रभावशाली नेता थिए, जसले सन् १९५१ मा राष्ट्रिय स्वयंसेवक संघ (आरएसएस) सँग मिलेर ‘भारतीय जनसंघ’ स्थापना गरेका थिए। पछि यही जनसंघ सन् १९८० मा भारतीय जनता पार्टी (भाजपा) को रूपमा पुनर्गठित भयो। भाजपाले मुखर्जीलाई आफ्नो वैचारिक संस्थापक र आदर्श पुरुषको रूपमा मान्दछ। पश्चिम बंगालको माटोमा भाजपाको यो सुरूवाती अग्रतालाई चौधरीले मुखर्जीको विरासत र राष्ट्रवादी भावनाको विजयको रूपमा व्याख्या गरेका छन्। हालको संकेतहरू अनुसार भाजपाले बंगालमा स्पष्ट बहुमत हासिल गर्दै अघि बढिरहेको छ।