ममता बनर्जीले निर्वाचन आयोग र केन्द्रीय सुरक्षा बलमाथि धाँधलीको आरोप लगाईन्

२१ वैशाख, काठमाडौं । पश्चिम बंगाल विधानसभा निर्वाचनको मतगणनामा भारतीय जनता पार्टी (भाजपा) ले उल्लेखनीय अग्रता हासिल गरेपछि मुख्यमन्त्री ममता बनर्जीले निर्वाचन आयोग र केन्द्रीय सुरक्षा बलमाथि गम्भीर आरोप लगाएकी छन् । सामाजिक सञ्जालमा साझा गरेको भिडियो सन्देशमा उनले पार्टीका एजेन्टहरूलाई कुनै पनि अवस्थामा गणना केन्द्र नछोड्न आग्रह गरेकी छिन् । रुझानका क्रममा भाजपाले १९२ सिटमा अग्रता कायम गरेको भने आफ्नो पार्टी तृणमूल कांग्रेस (टीएमसी) सिमित ९६ सिटमा मात्र सीमित रहेको अवस्थामा बनर्जीले यसलाई ‘भाजपाको योजना’ भन्दै आरोप लगाएकी छिन् । उनले निर्वाचन आयोग जानाजानी भाजपाले कब्जा गरेका क्षेत्रहरूको नतिजा देखाएको र टीएमसीको अग्रतालाई छिपाएको बताएकी छिन् ।

‘म हात जोडेर निवेदन गर्छु, कुनै पनि एजेन्ट गणना केन्द्रबाट बाहिर नजानुहोला,’ उनले भनिन्, ‘निर्वाचन आयोगले केन्द्रीय सुरक्षा बलसँग मिलेर गलत कार्य गरिरहेको छ । कल्याणी जस्ता स्थानहरूमा गणना नगरेका मेसिनहरू फेला परेका छन् र कतिपय स्थानमा गणना अवरुद्ध गरिएको छ ।’ पार्टी कार्यकर्तालाई हिम्मत दिँदै उनले थपिन्, ‘हाम्रो कार्यालयमा मानिसहरू जबर्जस्ती प्रवेश गरी कब्जा गर्न खोजिरहेका छन्, र केन्द्रीय सुरक्षा बलले अत्याचार गरिरहेको छ । तर, अहिले हार मान्ने समय होइन ।’ ममता बनर्जिले टीएमसी अझै ७० देखि १०० सिटहरूमा अग्रता कायम रहेको उल्लेख गरिन् । ‘जसको बारेमा गलत प्रचार भइरहेको छ । अहिले मतगणना केही चरण मात्र पूरा भएको छ, १४ देखि १८ चरणको गणना पछि हामी विजयी हुनेछौं । हामी बाघझैं लडिरहने छौं,’ उनले भनिन् । मुख्यमन्त्री बनर्जीले आफ्नै राज्य प्रहरी पनि केन्द्र सरकारसँग मिलेर काम गरेको भन्दै असन्तुष्टि व्यक्त गरिन् । भाजपाले बहुमत संख्या पार गरेको प्रारम्भिक रुझान देखाए पनि बनर्जीले अन्तिम नतिजा आफ्नो पक्षमा आउने दाबी गरिरहेकी छिन् । निर्वाचन आयोगले हालसम्म यी आरोपहरूको कुनै औपचारिक जवाफ दिएको छैन ।