२२ वैशाख, काठमाडौं। जल तथा मौसम विज्ञान विभागले सुदूरपश्चिम हुँदै पूर्वतर्फ सर्दै गरेको हुरीबताससहितको वर्षा गराउने प्रणालीको जानकारी दिएको छ। केही दिन यता बदली भएको मौसम केही दिन थप कायम रहनेछ। यस कारण आज देशका सबै प्रदेशका विभिन्न स्थानहरूमा हावाहुरीसहित वर्षा भइरहेको छ। मंगलबार आज पनि देशका केही भागमा हावाहुरी र वर्षाको सम्भावना छ। मौसम पूर्वानुमान महाशाखाका अनुसार कोशी, मधेश, बागमती, गण्डकी र लुम्बिनी प्रदेशका केही ठाउँमा मध्यम दर्जाको वर्षा हुने अनुमान गरिएको छ। अन्य प्रदेशका साना क्षेत्रमा पनि वर्षा हुने सम्भावना रहेको छ। राति यी प्रदेशहरूमा बदली रहन्छ र केही क्षेत्रहरूमा मेघगर्जनसहित वर्षा हुने सम्भावना छ। बुधबार पनि कोशी, मधेश, बागमती, गण्डकी र लुम्बिनी प्रदेशसहित अन्य प्रदेशका पहाडी तथा हिमाली भूभागमा बदली रहनेछ। ती क्षेत्रका केही ठाउँमा मेघगर्जनसहित मध्यम वर्षा र तराईका केही भागमा हल्का वर्षा हुनसक्ने जनाइएको छ। विभागले हुरीबतास, चट्याङ र सम्भावित भारी वर्षाबाट हुनसक्ने क्षतिको न्यूनीकरणका लागि सबैमा सतर्कता अपनाउन आग्रह गरेको छ।
