कोलोराडोस्थित नेपालीभाषी समुदायले मे १६ तारिखमा बोल्डर सहरमा नेपाल दिवस परेड आयोजना गर्ने तयारी थालेका छन्। रकी माउन्टेन फ्रेन्ड्स अफ नेपालले आयोजना गर्ने उक्त परेडमा बोल्डर सिटीका महापौर एरोन ब्रोकेटलगायत विभिन्न अतिथिहरू सहभागी हुने घोषणा गरिएको छ। पर्याप्त सङ्घ-संस्थाहरूलाई आफ्ना संस्कृतिक झल्काउने भेषभूषा र ब्यानरसहित कार्यक्रममा सहभागिता जनाउन आग्रह गरिएको छ।
कोलोराडोका नेपालीभाषी समुदायले नेपाली भाषा, संस्कृति र पहिचानको संरक्षण गर्ने उद्देश्यअन्तर्गत विभिन्न सांस्कृतिक कार्यक्रमसहित नेपाल दिवस परेड आयोजना गर्दैछन्। रकी माउन्टेन फ्रेन्ड्स अफ नेपालका उपाध्यक्ष हरि गुरुङले सूचित गरे अनुसार हेल्पिङ ह्यान्ड हेल्थ एजुकेसन र एनआरएनए एनसीसीको सहयोगमा यहाँका सबै सङ्घ-संस्थाहरूको सहभागितामा यो परेड आयोजना गरिनेछ। मे १६, आइतबार अपराह्न १२ बजेदेखि दिउँसो ३ बजेसम्म बोल्डर सहरमा सञ्चालन हुनेछ। यस कार्यक्रममा स्थानीय बोल्डर सिटीका महापौर एरोन ब्रोकेटसहित विभिन्न अतिथिहरू सहभागी हुने क्रम रहेको छ।
कार्यक्रमलाई अझ मनोरञ्जनात्मक बनाउन नेवाः खलः, मगर समाज, तमु प्ये ल्हु सङ्घ लगायतका सङ्घ-संस्थाले आ-आफ्नो संस्कृतिलाई झल्काउने सङ्गीत प्रस्तुति दिने योजना बनाएको रकी माउन्टेन फ्रेन्ड्स अफ नेपालकी अध्यक्ष आकृति राईले जानकारी दिइन्। कोलोराडोस्थित सबै सङ्घ-संस्थाका प्रतिनिधि, बुद्धिजीवी, समाजसेवी तथा नेपाल र नेपालीप्रति सद्भाव राख्ने सबैलाई उपस्थित भएर कार्यक्रमलाई सभ्य र भव्य बनाउन सहयोग गर्न अध्यक्ष राईले आग्रह गरेकी छिन्।
कोलोराडोको बोल्डरमा हरेक वर्ष यो परेड आयोजना हुँदै आएको छ। अमेरिकाका विभिन्न राज्यहरूमा पनि नेपाली परेडहरू आयोजना हुन थालेका छन्, तर कोलोराडोको परेड भने बोल्डर सिटी एन्ड काउन्टीको कार्यालयले सन् २००४ देखि नेपाली भाषा, संस्कृति र पहिचान संरक्षणका लागि हरेक वर्ष नेपाल दिवस परेड आयोजना गर्ने घोषणा गरेपछि सुरु भएको हो। अमेरिकाका पचास राज्यमध्ये कोलोराडो यस्तो प्रकारको कार्यक्रम आयोजना गर्ने पहिलो राज्य हो।
