सरकारले स्वास्थ्य विज्ञान प्रतिष्ठान तथा अस्पतालमा पूर्णकालीन नेतृत्व चयन नहुँदासम्म निमित्त जिम्मेवारी तोकेको छ। स्वास्थ्य मन्त्रालयले पाटन, पोखरा, कर्णाली लगायतका प्रतिष्ठानमा प्रा.डा. र डाक्टरहरुलाई अल्पकालीन जिम्मेवारी दिएका छन्। मन्त्रालयले चाँडै खुल्ला प्रतिस्पर्धा र मेरिटको आधारमा पूर्णकालीन नेतृत्व चयन गर्ने तयारी गरिरहेको जनाएको छ।
२४ वैशाख, काठमाडौं। सरकारले स्वास्थ्य विज्ञान प्रतिष्ठान र केही अस्पतालहरूमा निमित्त जिम्मेवारी तोकेको छ। स्वास्थ्य मन्त्री निशा मेहताको सचिवालयका अनुसार, निमित्त नियुक्ति अत्यावश्यक कार्यहरूमा रोकावट नआओस् भनी अस्थायी रूपमा गरिएको व्यवस्था हो। पूर्णकालीन नेतृत्व चयन नभएसम्मका लागि मन्त्रालयले पाटन स्वास्थ्य विज्ञान प्रतिष्ठानमा प्रा.डा. समिता पन्त, पोखरा स्वास्थ्य विज्ञान प्रतिष्ठानमा डा. नरेन्द्र विक्रम गुरुङ, कर्णाली स्वास्थ्य विज्ञान प्रतिष्ठानमा सह-प्रा.डा. विनम्र विष्टलाई निमित्त जिम्मेवारी दिएको छ।
त्यसैगरी, बीपी कोइराला स्वास्थ्य विज्ञान प्रतिष्ठान (धरान) मा सह-प्रा.डा. इन्द्र लिम्बू, राप्ति स्वास्थ्य विज्ञान प्रतिष्ठानमा सह-प्रा.डा. सुरेश रसाइली, बीपी कोइराला मेमोरियल क्यान्सर अस्पतालमा डा. उमेश नेपाल, शहीद गंगालाल राष्ट्रिय हृदय केन्द्रमा सह-प्रा.डा. रविन्द्रभक्त तिमलालाई जिम्मेवारी दिएको छ। स्वास्थ्य बिमा बोर्डमा पनि शकुन्तला प्रजापतिलाई निमित्त जिम्मेवारी दिइएको मन्त्री मेहताको सचिवालयले जनाएको छ।
सचिवालयको भनाइ अनुसार, स्वास्थ्य क्षेत्रमा सुधार ल्याउन र योग्य नेतृत्व चयन गर्न कुनै सम्झौता नगर्ने गरी अघि बढिएको छ। छिट्टै खुल्ला प्रतिस्पर्धा आह्वान गरी मेरिटको आधारमा पूर्णकालीन नेतृत्व चयन गर्ने तयारी तीव्र पारिएको छ। सरकारको स्पष्ट नीति र निर्देशन छ कि नेतृत्व चयन खुल्ला प्रतिस्पर्धा र मेरिटको आधारमा मात्र हुनेछ। हालै जारी गरिएको सार्वजनिक पदाधिकारीको पदमुक्ति सम्बन्धी विशेष व्यवस्थाको अध्यादेशका कारण यी स्वास्थ्य निकायहरू नेतृत्वविहीन भएका थिए। नेतृत्व नहुँदा बिरामीको उपचार, दैनिक सेवा प्रवाह र प्रशासनिक कामकाजमा कुनै अवरोध नआओस् भन्ने उद्देश्यले मन्त्रालयले तत्काल निमित्त प्रमुखहरूको नियुक्ति गरेको हो।
सम्बन्धित खबर
