सिफारिस समितिले आठ विश्वविद्यालयमा रिक्त उपकुलपति पदमा आवेदन आह्वान गरेको छ। उपकुलपति नियुक्तिका लागि विज्ञ उपसमितिले योग्यता, अनुसन्धान अनुभव र प्रस्तुतीकरणको आधारमा मूल्यांकन गर्नेछ। उम्मेदवारले कम्तीमा १० वर्ष अनुसन्धान अनुभव राख्नुपर्नेछ र राजनीतिक दलको सदस्यता नराख्नुपर्ने बताइएको छ, साथै दरखास्त रद्द गर्ने व्यवस्था समेत रहेको छ। २५ वैशाख, काठमाडौं।
आठ वटा विश्वविद्यालयमा रिक्त उपकुलपति पदमा नियुक्ति गर्ने उद्देश्यले सिफारिस समितिले शुक्रबार आवेदन आह्वान गर्यो। अध्यादेश लागू भएपछि उपकुलपतिहरू पदमुक्त भएका थिए र समितिले खुल्ला प्रतिस्पर्धाबाट नियुक्ति प्रक्रिया अगाडि बढाउन लागेको हो। प्रधानमन्त्री तथा कुलपति बालेन शाहले शिक्षा मन्त्री सस्मित पोखरेलको संयोजकत्वमा तीन सदस्यीय सिफारिस समिति गठन गरेका थिए।
समितिले त्रिभुवन विश्वविद्यालय, पूर्वाञ्चल विश्वविद्यालय, पोखरा विश्वविद्यालय, लुम्बिनी बौद्ध विश्वविद्यालय, कृषि तथा वन विज्ञान विश्वविद्यालय, मध्यमपश्चिम विश्वविद्यालय, सुदूरपश्चिम विश्वविद्यालय र राजर्षि जनक विश्वविद्यालयमा उपकुलपति पदका लागि आवेदन आह्वान गरेको हो। आवेदन पेश गर्न १० दिनको समय दिइएको छ। विज्ञ उपसमितिले उम्मेदवारको शैक्षिक योग्यता, अनुसन्धान अनुभव, रणनीतिक दृष्टिमा तयार पारिएको कार्ययोजना र प्रस्तुतीकरणको अध्ययन गरी प्रारम्भिक मूल्याङ्कन गर्नेछ र उच्च अंक प्राप्त गर्ने १० जनाको सर्ट लिस्ट सार्वजनिक गर्नेछ।
