नेपाली कांग्रेसका पूर्व सभापति शेरबहादुर देउवाको समूहले सातै प्रदेशमा प्रदेशस्तरीय भेला आयोजना गर्ने तयारी गरेको छ। देउवा समूहले १५औँ महाधिवेशनको तयारीका लागि पार्टी संगठन सुदृढीकरण र एकता वृद्धि गर्ने उद्देश्यले भेला गर्ने जनाएको छ। प्रदेशस्तरीय भेलाहरू कोशी प्रदेशबाट २९ वैशाखमा विराटनगरमा सुरु गरिने र अन्य प्रदेशहरूमा मिति अनुसार आयोजना गरिनेछन्। २५ वैशाख, काठमाडौं – नेपाली कांग्रेसका निवर्तमान सभापति शेरबहादुर देउवाको समूह प्रदेशस्तरीय भेला गर्ने तयारीमा जुटेको छ। पार्टीले केन्द्रीय नीति अनुसन्धान तथा प्रशिक्षण प्रतिष्ठानमार्फत प्रदेशस्तरका कार्यक्रमहरू सञ्चालन गरिरहेका बेला, देउवा समूह आन्तरिक रणनीति निर्धारणका लागि प्रदेश भेला गर्ने तयारीमा छ। निवर्तमान कार्यवाहक सभापति पूर्णबहादुर खड्काको सचिवालयले यस समूहले सातै प्रदेशमा प्रदेशस्तरीय भेलाको तयारी गरिरहेको जनाएको छ।
देउवा निकट नेता मीन विश्वकर्माले विचार समूहका नेताहरूलाई एकताबद्ध राख्दै आन्तरिक छलफललाई प्रभावकारी बनाउने उद्देश्यले भेला गर्ने निर्णय गरिएको जानकारी दिए। उनले भने, “देउवा समूहले प्रदेशस्तरीय भेला गरेर आगामी १५औँ महाधिवेशनको तयारी गर्दैछ।” “विचार समूहको प्रदेशस्तरीय भेलाको उद्देश्य पार्टी संगठनलाई सुदृढ बनाउनु, १५औँ महाधिवेशनको तयारी अघि बढाउनु र निराश साथीहरूलाई पुन: सक्रिय र एकताबद्ध बनाउनु हो,” विश्वकर्माले बताए। वर्तमान राजनीतिक अवस्था र मुलुकको दिशाबारे साझा बुझाइ बनाएर आगामी कदम के हुने भन्ने विषयमा पनि प्रदेशस्तरीय भेलामा छलफल गरिनेछ।
देउवा समूहले प्रदेशस्तरीय भेला समन्वयका लागि कोशी प्रदेशमा कृष्णप्रसाद सिटौला, मधेशमा आनन्दप्रसाद ढुंगानालाई जिम्मेवारी दिएको छ। गण्डकी प्रदेशमा मेखलाल श्रेष्ठ, बागमती प्रदेशमा प्रकाशमान सिंह र डा. प्रकाशशरण महतले समन्वय गरिरहेका छन्। नेता विश्वकर्माका अनुसार लुम्बिनीमा निवर्तमान सहमहामन्त्री किशोरसिंह राठौर, कर्णालीमा पूर्वमुख्यमन्त्री जीवनबहादुर शाही र सुदूरपश्चिममा एनपी साउदलाई जिम्मा दिइएको छ। प्रदेशस्तरीय भेलाको सुरुवात कोशी प्रदेशबाट गरिने भएको छ। कोशी प्रदेशको भेला २९ वैशाखमा विराटनगरमा आयोजना गरिने नेता विश्वकर्माले जानकारी दिए।
