३० वैशाख, काठमाडौं । नेपाल इन्भेस्टमेन्ट मेगा बैंक (एनआईएमबी)ले आफ्नो प्रमुख कार्यकारी अधिकृत ज्योतिप्रकाश पाण्डेलाई नेपाल प्रहरीको केन्द्रीय अनुसन्धान ब्युरो (सीआईबी)ले अनुसन्धानका लागि नियन्त्रणमा लिएको विषयमा विभिन्न मिडियामा प्रकाशन भएका समाचारप्रति ध्यानाकर्षण भएको जनाएको छ। बैंकले बुधबार जारी गरेको विज्ञप्तिमा सीआईबीले सीईओ पाण्डेलाई ऋणी स्मार्ट टेलिकम प्रालिको सम्पत्ति लिलाम बिक्री गरेको आरोपमा नियन्त्रणमा लिएको जानकारी दिएको हो।
बैंकले जनाएको छ कि लिलाम बिक्री गरिने दूरसञ्चार सेवासँग सम्बन्धित विभिन्न उपकरणहरू सहितका सामग्री जडान भएका घरजग्गा धनीहरूलाई स्मार्ट टेलिकमले बुझाउनुपर्ने बाँकी घर बहाल र विद्युत् महसुल हालसम्म भुक्तान नभएको विषयमा अनुसन्धान जारी रहेको छ। एनआईएमबीले कर्जा असुली प्रक्रियाअनुसार उक्त कारबाही अघि बढाइएको र यस सम्बन्धमा आवश्यक कागजात र विवरण समयमा उपलब्ध गराउने प्रतिबद्धता व्यक्त गरेको छ।
एनआईएमबीले ३ असोज २०८२ मा ऋणी स्मार्ट टेलिकमसँग सम्बन्धित विभिन्न उपकरण र सामग्रीको लिलामी सूचना प्रकाशित गरेको थियो। लिलाम बिक्रीबाट प्राप्त कुल ४ अर्ब ६० करोडमा ४ अर्ब २२ करोड सहवित्तीयकरण कर्जा सुविधा चुक्ता भुक्तान भएको र बाँकी ३८ करोड ‘अर्नेस्ट मनी अक्सन एकाउन्ट’मा रोक्का गरिएको जानकारी पनि दिएको छ। बैंकले अनुसन्धान प्रक्रियाले दैनिक कार्य सञ्चालनमा कुनै नकारात्मक प्रभाव नपर्ने विषयमा सरोकारवालाहरुलाई विश्वस्त समेत गराएको छ।
सम्बन्धित खबर
