गूगलले १५ वर्ष पुरानो क्रोमबुकको अवधारणालाई प्रतिस्थापन गर्ने तयारी गरेको छ। कम्पनीले एन्ड्रोइड अपरेटिङ सिस्टम र क्रोमओएसको विशेषताहरूलाई एक साथ मिलाएर आर्टिफिसियल इन्टेलिजेन्समा आधारित नयाँ श्रेणीको ल्यापटप ‘गूगलबुक’ सार्वजनिक गरेको छ। यो केवल एउटा अपरेटिङ सिस्टम मात्र नभई जेमिनी एआईको शक्ति भएको एउटा ‘इन्टेलिजेन्स सिस्टम’ हो। यसले प्रयोगकर्ताका दैनिक कामहरू आफैं बुझेर सहज बनाउनेछ।
जेमिनी इन्टेलिजेन्स र म्याजिक पोइन्टर गूगलबुकको सबैभन्दा ठूला र विशेषता यसका कर्सरमा देखिनेछन्। गुगल डिपमाइन्ड टोलीसँगको सहकार्यमा विकास गरिएको ‘म्याजिक पोइन्टर’ले माउसको कर्सरलाई एआई एजेन्टमा परिवर्तन गर्नेछ। स्क्रिनमा कर्सर अलिकति मात्र चलाएसँगै जेमिनी एआई सक्रिय हुनेछ। प्रयोगकर्ताले कुनै इमेलमा आएको मितिमा कर्सर ओगट्दा यसले आफैं क्यालेन्डरमा मिटिङ सेट गर्ने विकल्प दिनेछ। त्यसैगरी, स्क्रिनमा आफ्नो कोठाको फोटो र नयाँ सोफाको फोटो छानिएमा यी दुवैलाई मिक्स गरेर कोठामा सोफा कस्तो देखिन्छ तुरुन्तै भिजुअलाइज (भर्चुअल रूपमा प्रस्तुत) गरिदिनेछ।
साधारण भाषाबाट विजेट निर्माणको सुविधा यसमा उपलब्ध हुनेछ जहाँ प्रयोगकर्ताले आफूलाई आवश्यक विजेटको बारेमा सामान्य भाषामा लेखेर कस्टमाइजड विजेट बनाउन सक्नेछन्। जेमिनीले इन्टरनेट, जिमेल र क्यालेन्डरजस्ता एपहरूबाट जानकारी संकलन गरी एउटै ड्यासबोर्ड तयार पार्नेछ। उदाहरणतया, यदि तपाईँ भ्रमणको योजना बनाउँदै हुनुहुन्छ भने जेमिनीले होटल बुकिङ, फ्लाइट विवरण र भ्रमणको दिन काउन्टडाउन गर्दै सुन्दर विजेट डेस्कटपमा बनाइदिनेछ।
गूगलबुक एन्ड्रोइड प्रविधिमा आधारित भएकाले यसले फोन र ल्यापटप बीचको दूरीलाई घटाउनेछ। ल्यापटपमा काम गर्दा भोक लागेको खण्डमा फोनको फुड डेलिभरी एपलाई ल्यापटपकै स्क्रिनमा खोलेर अर्डर गर्न सकिनेछ। ‘क्विक एक्सेस’ फिचरले फोनमा भएका फाइलहरूलाई कुनै ट्रान्सफर बिना सिधै ल्यापटपको फाइल ब्राउजरबाट हेर्न, खोज्न र प्रयोग गर्न दिन्छ।
नयाँ श्रेणीका ल्यापटपहरूका लागि गुगलले विश्वप्रसिद्ध कम्पनीहरू एसर, एसस, डेल, एचपी र लेनोभोसँग सहकार्य गरेको छ। गूगलबुकहरू प्रिमियम सामग्री र उत्कृष्ट क्राफ्टम्यानसिपका साथ बजारमा आउनेछन्। यसको बाहिरी कभरमा रहने ‘ग्लोबार’ लाइट एआई सक्रिय हुँदा आकर्षक रूपमा चम्कनेछ र त्यो भिजुअल रूपमा मात्र नभई एआई अन्तर्क्रियाका लागि पनि उपयोगी हुनेछ। यो नयाँ प्रविधिको विस्तृत विवरण र पहिलो गूगलबुक ल्यापटपहरू यस वर्षको अन्त्यतिर बजारमा उपलब्ध हुनेछन्।
