नेपाल प्रहरीले २०८३–२०८५ सम्मको त्रिवर्षीय रणनीतिक योजना सार्वजनिक गरेको छ। यो योजना नागरिक केन्द्रित प्रहरी सेवा र प्रविधि मैत्री रुपान्तरणलाई मुख्य प्राथमिकता दिन्छ। प्रहरी प्रधान कार्यालयले २०८०–२०८२ को कार्ययोजनामा ९४.७२ प्रतिशत उपलब्धि हासिल भएको जानकारी दिएको छ।
५ जेठ, काठमाडौं। मंगलबार प्रहरी प्रधान कार्यालयमा आयोजित समारोहमा प्रहरी महानिरीक्षक (आईजीपी) दानबहादुर कार्कीले यो रणनीतिक योजना सार्वजनिक गरे। नवप्रवर्तन, इमानदारी र तत्परताको माध्यमबाट प्रहरी सेवामा रुपान्तरण गर्ने लक्ष्यसहित २०८३–२०८५ को योजना जारी गरिएको छ। यो योजना नयाँ आर्थिक वर्ष अर्थात् १ साउनदेखि लागू हुने बताइएको छ।
आईजीपी कार्कीले रणनीतिक योजनामा नागरिक केन्द्रित प्रहरी सेवा र प्रविधि मैत्री रुपान्तरणलाई प्राथमिकता दिइएको जानकारी दिए। यस योजनाले प्रहरी संगठनलाई सक्षम, उत्तरदायी र भरोसायोग्य संस्थाको रुपमा स्थापित गर्ने लक्ष्य राखेको छ। २०८०–२०८२ को कार्ययोजनामा १३ वटा प्रमुख लक्ष्य, ४० वटा कार्यगत उद्देश्य र २०७ वटा क्रियाकलाप समावेश थिए, जसको ९४.७२ प्रतिशत प्राप्ति भएको छ।
