काभ्रेपलाञ्चोकको नमोबुद्ध नगरपालिकामा मृत कागमा गरिएको परीक्षणले लो प्याथोजेनिक एच–९ प्रकारको बर्डफ्लु पुष्टि गरेको छ। नगरपालिकाले बर्डफ्लुबाट मानव स्वास्थ्य जोखिम न्यूनिकरणका लागि सबै सरोकारवालालाई उच्च सतर्कता अपनाउन आग्रह गरेको छ। कुखुरा फार्महरूमा जैविक सुरक्षा विधि कडाइका साथ लागू गर्न र बिरामी कुखुरा देखिए पशु सेवा कार्यालयमा खबर गर्न निर्देशन दिएको छ।
काभ्रेपलाञ्चोकको नमोबुद्ध नगरपालिका क्षेत्रभित्र बर्डफ्लु पुष्टि भएको समाचार छ। नमोबुद्ध नगरपालिकाका प्रमुख प्रशासकीय अधिकृत कृष्ण गिरीका अनुसार, वडा नं. २ स्थित २६ नम्बर बाहिनी सैनिक ब्यारेक वरिपरि मृत कागहरूमध्ये गरिएको परीक्षणले बर्डफ्लु पुष्टि गरेको हो।
नगरपालिकाले सङ्कलन गरेका नमुना केन्द्रीय पशुपन्छी रोग अनुसन्धान प्रयोगशाला, त्रिपुरेश्वर, काठमाडौंमा परीक्षणका लागि पठाएको थियो।
‘प्रयोगशालाबाट प्राप्त परीक्षण नतिजाअनुसार, लो प्याथोजेनिक एच–९ प्रकारको बर्डफ्लु पुष्टि भएको छ,’ प्रमुख प्रशासकीय अधिकृत गिरीले जानकारी दिए। नगरपालिकाले जारी गरेको सूचनामा बर्डफ्लु रोगबाट मानव स्वास्थ्यमा पर्न सक्ने जोखिम न्यूनिकरण तथा संक्रमण फैलिन नदिन सबै पक्षसँग उच्च सतर्कता अपनाउन अपिल गरेको छ।
