नेपाली मूलकी बेलायती डिजाइनर संयुक्ता श्रेष्ठले लन्डन वेडिङ अवार्ड्स २०२६ मा ‘वेडिङ बुटिक अफ द इयर’ उपाधि जितेकी छन्। श्रेष्ठको बुटिकले नवप्रवर्तन र सामाजिक उत्तरदायित्वमा विश्वस्तरीय मान्यता पाएको छ। उनले १५ वर्षदेखि वातावरणमैत्री फेसनमा काम गर्दै महिला शिल्पीहरूको मिहिनेतलाई प्राथमिकता दिएकी छन्।
लन्डनमा विगत डेढ दशकदेखि वातावरणमैत्री उच्चस्तरीय फेसन प्रवर्द्धन गर्दै आएकी प्रतिष्ठित फेसन हाउसकी संस्थापक तथा नेपाली मूलकी बेलायती डिजाइनर संयुक्ता श्रेष्ठ ‘लन्डन वेडिङ अवार्ड्स २०२६’ मा सर्वोच्च उपाधि ‘वेडिङ बुटिक अफ द इयर’ विजेता बनेकी छिन्। गत मे १३ मा आयोजित विशेष अवार्ड समारोहमा श्रेष्ठको बुटिकलाई यस विधाको विजेता घोषणा गरिएको हो। सार्वजनिक मतदान र उद्योग विशेषज्ञहरूको मूल्याङ्कनका आधारमा प्राप्त यो उपाधिले श्रेष्ठको फ्ल्यागसिप बुटिकलाई नवप्रवर्तन र सामाजिक उत्तरदायित्वको विश्वस्तरीय उदाहरणको रूपमा मजबुत बनाएको छ।
सन् २०११ देखि लन्डन फेसन क्षेत्रमा काम गर्दै आएकी श्रेष्ठले वातावरणमैत्री शब्द बजारमा परिचित नभएको बेला आफ्नो इको-फ्रेन्डली ब्रान्ड सुरु गरेकी थिइन्। उनले तयार गरेको डिजाइन विश्वप्रसिद्ध ‘फेसन म्युजियम’ को १६औं शताब्दीका १ लाखभन्दा बढी ऐतिहासिक सामग्रीहरू रहेको संग्रहमा पनि सुरक्षित राखिएको छ। बेलायतको १० अर्ब पाउन्ड मूल्य बराबरको वेडिङ क्षेत्रमा यो अवार्डले सांस्कृतिक र प्रतीकात्मक ठूलो महत्त्व राख्छ।
संयुक्ता श्रेष्ठले आफ्नो सिर्जना र शिल्प पछाडिको समुदायप्रति आभार व्यक्त गर्दै भनिन्, ‘म सोचमा डिजाइनर र भावनामा कलाकार हुँ, तर एक बेहुलीको सपनालाई साकार पार्नु मेरो कलाको वास्तविक उद्देश्य हो। हाम्रो लन्डनस्थित बुटिक सधैं सचेत र वातावरणमैत्री बेहुलीहरूका लागि एउटा सुरक्षित र पवित्र स्थान बन्न आएको छ।’ उनले यो सम्मान हाम्रा दुलहीहरू, मेरो समर्पित टोली, र हाम्रा दक्ष महिला शिल्पीहरूका सृजनशील हातहरूमा समर्पित गर्न चाहन्छिन्।
