चेन्नई सुपर किङ्स आईपीएल २०२६ को लिग चरणबाट बाहिरिएको छ। गुजरात टाइटन्सले चेन्नईलाई ८९ रनले पराजित गरेको छ। गुजरातले १४ खेलमा १८ अंक जोड्दै दोस्रो स्थानमा रहेको छ। ७ जेठ, काठमाडौं। पाँच पटकको च्याम्पियन चेन्नई सुपर किङ्स आईपीएल २०२६ को लिग चरणबाट बाहिरिएको खबर पुष्टि भएको छ। बिहीबार राति भएको खेलमा गुजरात टाइटन्ससँग ८९ रनको फराकिलो हार बेहोरेपछि चेन्नई प्रतियोगिताबाट बाहिरिएको हो।
गुजरातले दिएको २३० रनको लक्ष्य पछ्याएको चेन्नई १३.४ ओभरमा १४० रनमा अलआउट भयो। शिव दुबेको १७ बलमा ४७ रनको आक्रामक पारी बाहेक अन्य ब्याट्सम्यानहरूले अपेक्षित प्रदर्शन गर्न सकेनन्। म्याथ्यु शर्टले २४, कार्तिक शर्मा र अन्शुल कम्बोजले समान १९ तथा कप्तान रुतुराज गायक्वाडले १६ रन बनाए। गुजरातका लागि मोहम्मद सिराज, कगिसो रबाडा र राशिद खानले समान ३-३ विकेट लिए।
टस हारेर पहिले ब्याटिङ गर्ने मौका पाएको गुजरातले २० ओभरमा ४ विकेट गुमाउँदै २२९ रन बनायो। साइ सुदर्शनले सर्वाधिक ८४ रन बनाए। कप्तान शुभमन गिलले ६४ र जस बट्लरले अविजित ५७ रनको योगदान दिए। चेन्नईका मुकेश चौधरी, स्पेनसर जोनसन र अन्शुल कम्बोजले १-१ विकेट लिए। यो जितपछि गुजरातको अंक तालिकामा १४ खेलमा १८ अंक पुगेको छ र दोस्रो स्थानमा रहेको छ। शीर्ष दुई स्थानमा रहनको सम्भावना बलियो बनेको छ।
