७ जेठ, चितवन । चितवन प्रहरीले सात वर्षपहिले भएको हत्या घटनामा संलग्न र फरार रहेको आरोपितलाई पक्राउ गरेको छ। पक्राउ परेका व्यक्ति बारा फेटा गाउँपालिका–४ का पञ्चदेव महरा हुन्। इलाका प्रहरी कार्यालय रत्ननगर टाँडी र इलाका प्रहरी कार्यालय खैरहनीको संयुक्त टोलीले जेठ ५ गते राप्ती बाराको फेटा गाउँपालिका–१ त्रिवेणी टोलबाट पञ्चदेव महरालाई पक्राउ गरी चितवन ल्याएको हो।
इप्रका टाँडीका अनुसार महराले २०७६ सालमा चितवनमा भएको एक हत्यामा संलग्नता रहेको आरोप लागेको छ। २०७६ चैत २३ गते साँझ ७ बजे चितवन खैरहनी नगरपालिका–९ मा बाराकै फेटा गाउँपालिका–३ का ४६ वर्षीय सखिचन महरा मृत अवस्थामा फेला परेका थिए। शव नेपाल ग्याँस उद्योग गण्डकीमा कार्यरत मजदुर बस्ने कच्ची घरभित्र भेटिएको थियो। सखिचनको बायाँ कान पछाडि गहिरो चोट लागेको थियो भने बायाँ हातको पाखुरा भाँचिएको अवस्था रहेको प्रहरीले जनाएको छ। प्रारम्भिक अनुसन्धानबाट उनको हत्या भएको पुष्टि भएको थियो।
अनुसन्धान क्रममा सखिचनको हत्यामा तत्कालीन ३० वर्षीय पुनदेव भनिने पञ्चदेव महराको संलग्नता रहेको पाइएको प्रहरीले जनाएको छ। यसपछि प्रहरीले उनलाई पक्राउ गर्न चितवन जिल्ला अदालतबाट २०७६ चैत २५ गते अनुमति समेत लिएको थियो, तर उनी फरार थिए। हाल उनीलाई पक्राउ गरी चितवन जिल्ला अदालतमा पेश गरिएको छ र पाँच दिन हिरासत म्याद लिएर थप अनुसन्धान अघि बढाइएको छ।
