सूचना तथा सञ्चारमन्त्री डा. विक्रम तिमिल्सिनाले फोरजी सेवा विस्तार, डिजिटल पूर्वाधार निर्माण, डेटा सेन्टर सुदृढीकरण र साइबर सुरक्षामा लगानी सरकारको उच्च प्राथमिकतामा रहेको बताएका छन्। उनले आगामी आर्थिक वर्षमा नेटवर्क विस्तार, पूर्वाधार सुदृढीकरण र सेवा गुणस्तर सुधारका काम तीव्र रूपमा अघि बढाउने योजना बनाएको जानकारी दिए।
मन्त्री तिमिल्सिनाले ओभर द टप (ओटीटी) सेवालाई कानुनी दायरामा ल्याउन नियमावली निर्माण प्रक्रियामा रहेको र मिडिया काउन्सिल विधेयकमार्फत पत्रकारिता क्षेत्रका समस्या सम्बोधन गर्ने प्रयास भइरहेको बताए। उनले डिजिटल विभाजन अन्त्य गर्ने विषयलाई उच्च प्राथमिकतामा राख्दै त्यसका लागि तत्कालीन, मध्यमकालीन र दीर्घकालीन योजना अघि बढिरहेको स्पष्ट पारे।
सरकारले एक वर्षभित्र थप फोरजी विस्तार, नयाँ साइट स्थापना र आवश्यक पूर्वाधार निर्माण गरी दुर्गम क्षेत्रहरूमा समेत सेवा पुर्याउने स्पष्ट कार्ययोजना अघि बढाएको उनले जानकारी दिए। हालसम्म देशका ७५० स्थानीय तहमा फोरजी एलटीई सेवा पुगेको र ७५३ वटै स्थानीय तहमा टुजी सेवा विस्तार भइसकेको उनले बताएका छन्।
मन्त्री तिमिल्सिनाले हुलाक सेवाको आधुनिकीकरणतर्फ पनि सुधारका काम सुरु भइसकेको जानकारी दिए। स्मार्ट हुलाक कार्यालय स्थापना, सरकारी कुरियर सेवा र पार्सल सेवा विस्तार, डिजिटल हुलाक प्रणाली विकासलगायतका कार्यक्रम अगाडि बढाइएको उनले बताए।
