इरानले इजरायलमा क्षेप्यास्त्र आक्रमण गर्यो, नेतन्याहुले भने- आजको साँझ धेरै कठिन छ
इजरायलका आपत्कालीन सेवाका अनुसार, दक्षिणी सहर अरदमा भएको इरानी क्षेप्यास्त्र आक्रमणमा ८८ जना घाइते भएका छन्। प्रधानमन्त्री बेन्जामिन नेतन्याहुले सामाजिक सञ्जालमा ‘आजको साँझ धेरै नै कठिन छ’ बताएका छन्। इजरायलले आइतबार र सोमबार भौतिक कक्षाहरू बन्द गरी देशभरि दूरशिक्षा सञ्चालन गर्ने निर्णय गरेको छ।
आक्रमणपछि, ‘म्यागेन डेभिड एडोम’ नामक आपत्कालीन सेवाका अनुसार, ८८ जना घाइते भएका छन् र अस्पतालमा भर्ना गरिएको छ। तीमध्ये १० जना गम्भीर अवस्थामा, १९ जना मध्यम रूपमा घाइते छन्, जबकि ५५ जनालाई सामान्य चोटपटक लागेको छ। नेतन्याहुले अरदका मेयरसँग कुराकानी गर्दै यी आक्रमणहरूलाई ‘धेरै कठिन साँझ’ भएको बताएका छन्।
नेतन्याहुले सामाजिक सञ्जाल एक्समा लेखेका छन्, ‘हाम्रो भविष्यका लागि जारी यस अभियानमा, आजको साँझ धेरै नै कठिन छ। मैले मेरो कार्यालयका महानिर्देशकलाई सबै सरकारी मन्त्रालयसँग मिलेर हरेक आवश्यक सहायता उपलब्ध गराउन निर्देशन दिएको छु।’ उनले थपे, ‘म घटनास्थलमा काम गरिरहेका आपत्कालीन र उद्धार टोलीहरूको मनोबल उच्च बनाउँदैछु र सम्पूर्ण जनतालाई ‘होम फ्रन्ट कमान्ड’ का निर्देशनहरू पालना गर्न अनुरोध गर्दछु।’
यसैबीच, इजरायलका शिक्षामन्त्री योआभ किशले आइतबार र सोमबार भौतिक कक्षाहरू नखोल्ने बताउँदै देशभरि मात्र दूरशिक्षा सञ्चालन हुने जानकारी दिएका छन्। उनले यो अवधिमा विशेष शैक्षिक छुटहरू रद्द हुने र बालबालिकाका लागि खेलकुद तथा मनोरञ्जन गतिविधि पनि बन्द रहने उल्लेख गरेका छन्। किशले मंगलबारअघि अवस्थाको पुनर्मूल्याङ्कन गरेपछि मात्रै आगामी निर्णय लिने बताएका छन्।
