समितिले आधा काम पूरा गरी अब सुधन गुरुङको बयान लिने तयारी गरिरहेको छ। उच्च अदालतका पूर्वन्यायाधीश अच्युतप्रसाद भण्डारीको अध्यक्षतामा कार्यरत समितिले तोकिएको १५ दिनभित्र तथ्य र प्रमाणसहित स्पष्ट प्रतिवेदन बुझाउने जानकारी दिएको छ। व्यवसायी दीपक भट्टसँगको साझेदारी विवादपछि ९ वैशाखमा राजीनामा दिएका गुरुङ छानबिनमा निर्दोष ठहरिए पुनः गृहमन्त्री बन्ने चर्चा चलिरहेको छ। १० जेठ, काठमाडौं।
तत्कालीन गृहमन्त्री तथा राष्ट्रिय स्वतन्त्र पार्टीका सांसद सुधन गुरुङमाथि छानबिन गर्न गठित समितिले गुरुङको बयान लिने प्रक्रिया अघि बढाउने भएको छ। मन्त्रिपरिषद्को २८ वैशाखको बैठकले उच्च अदालतका पूर्वन्यायाधीश अच्युतप्रसाद भण्डारी अध्यक्ष, महालेखा नियन्त्रक शोभाकान्त पौडेल र सहन्यायधिवक्ता अच्युतमणि नेउपाने सदस्य रहेको टोली गठन गरेको थियो। समितिले आफ्नो काम आधा हिस्सा पूरा गरिसकेको छ। समितिमा स्रोतका अनुसार अब गुरुङको बयान लिने कार्य अघि बढाइनेछ।
समितिका अध्यक्ष भण्डारीका अनुसार गुरुङ मन्त्री हुँदा उठेका विषयमा अनुसन्धान गर्न कार्यक्षेत्र तोकिएकोले त्यही अनुसार काम भइरहेको छ। ‘हाम्रो कार्यक्षेत्र भनेकै मन्त्री हुँदा उठेका विषयको छानबिन गरी प्रतिवेदन तयार गर्ने र सुझाव दिने हो। त्यसैअनुसार काम गरिरहेका छौँ,’ भण्डारीले भने। समितिले स्पष्ट नतिजासहित प्रतिवेदन पेश गर्ने जनाएको छ। दोषी भएमा स्पष्ट रूपमा दोषी र निर्दोष भए त्यसको कारणसहित स्पष्ट प्रतिवेदन प्रस्तुत गरिनेछ।
गुरुङमाथिको आरोपहरू के हुन् ? सम्पत्ति शुद्धीकरणको आरोपमा व्यवसायी दीपक भट्ट १९ चैतमा काठमाडौंबाट पक्राउ परेका थिए। भट्ट हाल पनि प्रहरी हिरासतमा छन्। भट्टसँगको साझेदारी देखिएको हुनाले गुरुङ विवादमा तानिएका थिए। राजीनामा दिने क्रममा गुरुङले फेसबुकमा लेखेका थिए, ‘पछिल्ला दिनहरूमा नागरिक स्तरबाट सेयर लगायतका विषयहरूमा उठेका प्रश्न, टिप्पणी र जनचासोलाई मैले गम्भीरतासाथ लिएको छु। मेरो लागि पदभन्दा ठूलो नैतिकता हो। जनविश्वासभन्दा ठूलो शक्ति कुनै हुँदैन।’
