११ जेठ, म्याग्दी । म्याग्दीको बेनी नगरपालिका–१० पात्लेखेतमा रहेको दीपक माध्यमिक विद्यालयका विद्यार्थीहरूलाई वातावरणमैत्री चोयाका सामान बनाउने सीप संरक्षण र हस्तान्तरण गर्न थालिएको छ। विद्यार्थीहरूलाई मौलिक र परम्परागत सीप हस्तान्तरण, संरक्षण तथा वातावरणमैत्री चोयाका सामग्रीहरूको प्रयोग बढाउने उद्देश्यले डोको, दाम्लो, स्याखु निर्माणसम्बन्धी तालिम सञ्चालन गरिएको छ। बेनी नगरपालिकाको ‘हामी सक्छौं, हामी गर्छौं’ कार्यक्रममार्फत कक्षा ९ र १० का विद्यार्थीहरूलाई तालिम सञ्चालन गरिएको दीपक माध्यमिक विद्यालयका सहायक प्रधानाध्यापक विजय सुवेदीले जानकारी दिनुभयो। एक महिनासम्म सञ्चालन हुने यस तालिममा २० जनाभन्दा बढी विद्यार्थीहरू सहभागी भएका छन्।
स्थानीय मनबहादुर परियारले पठनपाठन बाहेकको समयमा दैनिक एक घण्टाका दरले निगालोबाट चोया बनाउने र विभिन्न सामग्री बुन्ने सीप सिकाएका छन्। निगालो र बाँसको चोयाबाट डोका, नाङ्लो, डाली, थुन्से, भकारी, नाम्लो, दाम्लो आदि बनाउन सिकाइने जानकारी सहायक प्रअ सुवेदीले दिनुभयो। उहाँले अघिल्लो पुस्ताका नागरिकहरूको निधन भइसकेकाले नयाँ पुस्ताका युवायुवतीहरूमा ज्ञान र सीप हस्तान्तरण नभएको र प्लास्टिकबाट बनेका सामग्रीहरूको बढ्दो प्रयोगका कारण चोयाबाट बनेका सामग्री र सीप लोप हुने अवस्थामा पुगेको बताउनुभयो।
चोयाका सामग्रीहरू सामान भण्डारण र ढुवानीमा प्रयोग हुने भएकाले यी सामग्रीहरू वातावरणमैत्री पनि हुन्छन्। प्लास्टिकका सामानले प्रदूषण बढाइसकेको हुँदा चोयाबाट बनेका सामग्री प्रयोगमा ल्याउन विद्यार्थीहरूको मागअनुसार सीप हस्तान्तरणमा ध्यान दिइएको हो। प्रतिटुक्रा सामग्रीको मूल्य एक हजारदेखि दुई हजार ५०० रुपैयाँसम्म पर्न सक्छ। गाउँमै उपलब्ध कच्चा पदार्थको प्रयोगबाट आत्मनिर्भरता बढ्ने र वायु प्रदूषण बढाउने प्लास्टिकजन्य सामानको आयात घटेर आयआर्जनको अवसर सिर्जना हुने अपेक्षा गरिएको छ। बेनी नगरपालिकाले विद्यार्थी र शिक्षालाई सीप र श्रमसँग जोड्न माध्यमिक तहमा अध्ययन गर्ने विद्यार्थीलाई विद्यालयमै सीप सिकाउन ‘हामी सक्छौँ, हामी गर्छौँ’ कार्यक्रमलाई चार वर्षदेखि निरन्तरता दिँदै आएको छ। नगर प्रमुख सुरत केसीले जानकारी दिनुभयो कि ‘हाउस वायरिङ’, ‘प्लम्बिङ’, कपाल काट्ने, अतिथि सत्कार, खाना पकाउने, प्रेसर कुकर बनाउने लगायतका सीपमूलक तालिम सञ्चालन गर्न नगरपालिकाले चालु आर्थिक वर्षमा १४ वटा विद्यालयलाई प्रत्येक विद्यालयलाई एक लाख रुपैयाँ बराबरको बजेट उपलब्ध गराएको छ।
