११ जेठ, काठमाडौं । सभामुख डोल प्रसाद (डीपी) अर्यालले विगतका सरकारहरूले आवश्यक काम नगरेको कारणले अझै पनि आधारभूत आवश्यकताहरूका विषयमा छलफल र बहस गर्नुपर्ने अवस्था रहेको बताएका छन् । नागार्जुन नगरपालिकाद्वारा आयोजित वार्षिक नीति तथा कार्यक्रमसम्बन्धी छलफल कार्यक्रममा सहभागी सभामुख अर्यालले यस्तो अभिव्यक्ति दिएका हुन् ।
कार्यक्रमलाई सम्बोधन गर्दै सभामुख अर्यालले पूर्वाधार विकास, विशेष गरी सडक र खानेपानी जस्ता आधारभूत विषयहरूमा राजनीतिकरण गर्ने प्रवृत्तिको अन्त्य हुनु आवश्यक रहेको बताए । विगतका सरकारहरूले जनताको पक्षमा प्रभावकारी काम गरेको भए राजधानीमै पनि अहिले आधारभूत आवश्यकताहरूको विषयमा बहस गर्नुपर्ने अवस्था आउँदैनथ्यो, उनले बताए ।
सभामुख अर्यालले नयाँ सरकार र हालै आएको जनादेशसहितको जनप्रतिनिधिहरूबाट अब यस्ता नकारात्मक प्रवृत्तिहरू नदोहोरिनेमा विश्वास व्यक्त गर्दै जनमुखी विकास र सुशासनलाई प्राथमिकतामा राख्न आग्रह पनि गरे ।
