नेपाल पत्रकार महासंघले किशोर श्रेष्ठमाथि भइरहेका दुव्र्यवहारप्रति कडा निन्दा गरेको छ

११ जेठ, काठमाडौं । नेपाल पत्रकार महासंघले पत्रकार किशोर श्रेष्ठमाथि भइरहेको दुव्र्यवहारप्रति कडा निन्दा गरेको छ । सोमबार साँझ महासंघका महासचिव रामप्रसाद दाहालले एक प्रेस विज्ञप्ति जारी गर्दै पत्रकार श्रेष्ठमाथि भइरहेका व्यवहारलाई स्वतन्त्र प्रेस र लोकतन्त्रमाथि आक्रमणका रुपमा अभिव्यक्त गरेका छन् । ‘गृह मन्त्रालयको जिम्मेवारी सम्हाल्दै गरेका प्रधानमन्त्रीको निर्देशनमा आफूमाथि धरपकड गर्ने, धम्की दिने र समाचार स्रोत खुलाउन दबाब दिने गतिविधि बढिरहेको कुरा प्रेस काउन्सिल नेपालका पूर्वअध्यक्षसमेत रहेका श्रेष्ठले महासंघलाई जानकारी दिनुभएको छ,’ विज्ञप्तिमा उल्लेख छ।

‘समाचार लेखेको आधारमा श्रेष्ठमाथि भइरहेका व्यवहार स्वतन्त्र प्रेस र लोकतन्त्रप्रति जारी गरिएको स्पष्ट आक्रमण हो भन्ने महासंघको धारणा हो। यस किसिमको व्यवहारको महासंघ कडा रुपमा निन्दा गर्दछ।’ महासंघले प्रेस विरोधी यस्तो व्यवहार तत्काल रोक्न माग गर्दै, समाचारको विवाद भएमा प्रेस काउन्सिलमार्फत समाधान खोज्न सम्बद्ध पक्षसँग आग्रह गरेको छ। ‘साथै, पत्रकार श्रेष्ठलाई धम्क्याउने व्यक्तिको पहिचान गरी तत्काल कानुनी कारबाही गर्न महासंघले जोडदार माग गरेको छ,’ विज्ञप्तिमा उल्लेख छ।