वैज्ञानिकहरूले मानव इतिहासमा पहिलो पटक प्रयोग भएका सबैभन्दा पुराना काठका हाते औजारहरू फेला पारेका छन्। ग्रीसको एक प्राचीन तालको किनारमा भेटिएका यी परम्परागत औजारहरू करिब ४ लाख ३० हजार वर्ष पुराना रहेको अनुसन्धानकर्ताहरूले दाबी गरेका छन्। युनिभर्सिटी अफ रिडिङ र जर्मनीको युनिभर्सिटी अफ ट्युबिन्जेनका वैज्ञानिकहरूको अन्तर्राष्ट्रिय टोलीले ग्रीसको ‘मराथुसा १’ नामक पुरातात्त्विक स्थलमा यी वस्तुहरू फेला पारेका हुन्।
वैज्ञानिक जर्नल ‘पीएनएएस’मा प्रकाशित प्रतिवेदन अनुसार, यी औजारहरू मध्ये एउटाको निर्माण ‘एल्डर’ जातको काठबाट र अर्को ‘विलो’ वा ‘पपलर’ जातको काठबाट गरिएको छ। यस खोजले काठका औजार प्रयोगको इतिहासलाई कम्तीमा ४० हजार वर्षभन्दा पहिलेलाई धकेलिदिएको छ। जहाँ यी औजार फेला परेका छन्, त्यहाँ काठका हाते औजारका साथै ढुङ्गे औजार र प्राचीन हात्तीका अवशेषहरू पनि भेटिएका छन्। यसले आदिम मानवहरू तालको किनारमा जनावरहरूको सिकार गरी मासु काट्थे भन्ने कुरा देखाउँछ।
ढुङ्गाको तुलनामा काठ लामो समयसम्म सुरक्षित रहन गाह्रो भए पनि, त्यहाँको विशेष वातावरणका कारण यी औजारहरू जोगिन सकेका हुन्। वैज्ञानिकहरूका अनुसार, यी काठका लौराहरू जमीन खन्न वा रुखको बोक्रा निकाल्न प्रयोग गरिन्थ्यो। यसअघि बेलायत, जर्मनी, जाम्बिया र चीनमा पनि पुराना काठका हतियार र औजारहरू भेटिएका थिए, तर ती सबै ग्रीसमा फेला परेका औजारभन्दा नयाँ छन्।
सम्बन्धित खबर
