प्रतिनिधिसभाको बैठकले राष्ट्रियसभाबाट आएको ‘चलचित्र विधेयक २०८२’ माथि विचार गर्न सर्वसम्मतिले स्वीकृति दिएको छ। सञ्चारमन्त्री विक्रम तिमिल्सिनाले चलचित्र विधेयक २०८२ लाई समयसापेक्ष र चलचित्र क्षेत्रमा विकास ल्याउने खालको बनाउन सरकार प्रतिबद्ध रहेको बताए। यो प्रस्ताव स्वीकृत भएपछि अब संसद सदस्यहरुले विधेयकमाथि संशोधन प्रस्ताव दर्ता गर्न सक्नेछन्।
काठमाडौं। सूचना तथा सञ्चारमन्त्री विक्रम तिमिल्सिनाले राष्ट्रियसभाबाट प्रतिनिधिसभामा आएको चलचित्र विधेयक २०८२ लाई आधुनिक, समयसापेक्ष र चलचित्र क्षेत्रलाई प्रोत्साहित गर्ने खालको बनाउन सरकार गम्भीर रहेको बताएका छन्। प्रतिनिधिसभाको आजको बैठकमा चलचित्र विधेयकमाथि उठेका प्रश्नहरूको जवाफ दिँदै उनले सरकारले विधेयकको मर्म र उद्देश्यलाई ध्यानमा राखेर संसदबाट आएका सुझावहरूलाई रचनात्मक रूपमा ग्रहण गर्ने प्रतिबद्धता व्यक्त गरे।
सञ्चारमन्त्री तिमिल्सिनाले लामो समयपछि चलचित्र क्षेत्र कानूनी सुधारको प्रक्रियामा प्रवेश गरेको उल्लेख गर्दै संसदीय समितिहरूमा विज्ञहरूको सुझावलाई समेटेर विधेयकलाई थप परिमार्जित बनाउनुपर्ने आवश्यकतालाई जोड दिए। उनले चलचित्रसम्बन्धी परिभाषादेखि संरचनागत र व्यवस्थापकीय विषयसम्म आएका सुझावलाई मन्त्रालयले अध्ययन गरिरहेको जानकारी दिँदै आवश्यक संशोधन र सुधारका लागि सरकार प्रतिबद्ध रहेको बताए।
संसदमा उठेका सबै विषयलाई गम्भीरतापूर्वक लिएर आवश्यक प्रक्रिया अपनाई विधेयकलाई प्रभावकारी बनाउन सरकार प्रतिबद्ध छ भनी उनले व्यक्त गरे। संसदबाट प्राप्त सुझाव र प्रतिक्रियाले विधेयकलाई अझ सशक्त र प्रभावकारी बनाउन सहयोग पुग्ने विश्वास पनि सञ्चारमन्त्री तिमिल्सिनाले व्यक्त गरे।
