समाचार सारांश टाइम्स इन्टरनेसनलले हिमालयन जाभा नेसनल बास्केटबल लिग २०२६ मा प्लेबक्स एरेनालाई ८५-७३ ले पराजित गर्दै आफ्नो चौथो जीत हासिल गरेको छ। आर्मी टोलीले रोएललाई १०३-७५ अंकले पराजित गरी पाँच खेलबाट ९ अंक जोड्दै शीर्ष स्थानमा कायम छ। एचजेएनबीएलमा ८ टोलीले प्रतिस्पर्धा गरिरहेका छन् र शीर्ष चार टोलीले प्लेअफमा स्थान बनाउनेछन्।
५ चैत, काठमाडौं । हिमालयन जाभा नेसनल बास्केटबल लिग (एचजेएनबीएल) २०२६ मा टाइम्स इन्टरनेसनल क्लबले आफ्नो चौथो जीत प्राप्त गरेको छ। त्रिपुरेश्वरस्थित दशरथ रंगशालाको कभर्ड हलमा बिहीबार सम्पन्न खेलमा टाइम्सले प्लेबक्स एरेनालाई ८५–७३ अंकले पराजित गरेको थियो।
खेलमा टाइम्सले पहिलो क्वाटरमा २६-१६ को अग्रता बनाएको थियो। दोस्रो क्वाटर १६-१५ अन्तरले आफ्नो पक्षमा पारेको टोलीले हाफटाइमसम्म ४२-३१ को अन्तर कायम राख्यो। तेस्रो क्वाटरको अवधि टाइम्सले २३-१७ ले जित्यो। चौथो क्वाटरमा प्लेबक्सले २५-२० को अग्रता बनायो, तर त्यो समयमै टाइम्सलाई जितबाट रोक्न सकेन। कमल थापा टाइम्सका प्लेयर अफ दि म्याच घोषित भए।
टाइम्सले पाँच खेलमा चौथो जीतपछि कुल ९ अंक जोडेको छ। शीर्ष स्थानको आर्मी पनि समान अंकको साथ दोस्रो स्थानमा छ, तर अंक अन्तरका कारण पछि छ। बुधबार राति भएको खेलमा आर्मीले रोएललाई १०३-७५ ले पराजित गरेको थियो। पाँच खेल खेल्दा आर्मीले यो आफ्नो चौथो जीत हासिल गरेको छ र ९ अंकसहित स्पष्ट अग्रतामा छ। रोएलले पाँच खेलबाट ६ अंक जोडेको छ र यो उसको चौथो हार हो।
नेपाल बास्केटबल संघ (नेबा) को आयोजनामा भइरहेकि दोस्रो संस्करणको एचजेएनबीएलमा ८ टोलीले प्रतिस्पर्धा गरिरहेका छन्। डबल राउण्ड रोबिन प्रणालीमा हुने लिगमा कुल ५६ खेल खेलिने छन्। लिग चरणपछि शीर्ष चार स्थानमा रहने टोलीहरू प्लेअफमा प्रवेश गर्नेछन्। प्लेअफमा शीर्ष दुई टोलीबीच पहिलो क्वालिफायर खेल हुनेछ भने तेस्रो र चौथो स्थानका टोलीबीच एलिमिनेटर खेल हुनेछ। पहिलो क्वालिफायरमा पराजित टोली र एलिमिनेटरको विजेताबीच दोस्रो क्वालिफायर खेल हुनेछ। दोस्रो क्वालिफायरको विजेताले पहिलो क्वालिफायरको विजेतासँग फाइनल खेल्नेछ।
प्रतियोगिताको विजेताले ४ लाख रुपैयाँ नगद पुरस्कार प्राप्त गर्नेछ। उपविजेताले २ लाख र तेस्रो स्थानको टोलीले १ लाख नगद पुरस्कार पाउनेछ। साथै, उत्कृष्ट प्रदर्शन गर्ने मोस्ट भ्यालुएबल प्लेयर (एमभीपी) लाई पनि आकर्षक पुरस्कार प्रदान गरिने नेबाले जनाएको छ।
