समाचार सारांश इप्पानले लाङटाङ राष्ट्रिय निकुञ्ज क्षेत्रमा रोकिएका पाँच जलविद्युत् आयोजनाको काम सुरु गराउन वन मन्त्री गीता चौधरीको ध्यानाकर्षण गराएको छ। इप्पानका अध्यक्ष गणेश कार्कीले वातावरणीय प्रभाव मूल्याङ्कन स्वीकृत भएपछि पनि आयोजना निर्माण रोकिँदा निजी क्षेत्र निराश भएको बताए। मन्त्री चौधरीले जलविद्युत् आयोजनाको काम सुरु गराउन आवश्यक सहजीकरण गर्ने र नीतिगत सुधार गर्न लागेको जानकारी गराउनुभयो। १३, जेठ काठमाडौं। स्वतन्त्र ऊर्जा उत्पादकहरूको संस्था, नेपाल (इप्पान) ले लाङटाङ राष्ट्रिय निकुञ्जको निर्देशनमा निर्माण रोकिएका ५ जलविद्युत् आयोजनाको काम सुरु गराउन माग गर्दै कृषि, वन तथा वातावरण मन्त्री गीता चौधरीको ध्यानाकर्षण गराएको छ। इप्पान अध्यक्ष गणेश कार्कीको नेतृत्वमा गएको प्रतिनिधि मण्डलले बुधबार मन्त्री चौधरीलाई भेटेर राष्ट्रिय प्राथमिकता प्राप्त जलविद्युत आयोजनाको काम यथाशीघ्र सुरु हुने वातावरण निर्माण गर्न आग्रह गरेको हो। मन्त्री चौधरीलाई मागपत्र बुझाउँदै अध्यक्ष कार्कीले निकुञ्ज भित्र धेरै आयोजना निर्माणको सम्भावना भए पनि निकुञ्ज क्षेत्रका आयोजनाको वातावरणीय प्रभाव मूल्याङ्कन प्रतिवेदन स्वीकृति भइसकेपछि पनि आयोजना निर्माणमा रोक लगाउनुले निजी क्षेत्र निरुत्साहित भएको बताए। उनले यसमा सहजीकरण गर्न मन्त्रीलाई आग्रह गरे। ‘ऊर्जा मन्त्रालयले करोडौँ रुपैयाँ राजस्व लिएर आयोजना विकास गर्न अनुमति दिन्छ, अर्कोतिर वन मन्त्रालयको एउटा निकायले वातावरणीय प्रभाव मूल्यांकन पारित गर्छ, अनि अर्को निकायले आयोजना अघि बढ्न अनुमति नदिई आयोजना निर्माण रोक्नु गलत छ। निजी क्षेत्रलाई प्रोत्साहित गर्न मन्त्रालयबाट सहजीकरण आवश्यक छ,’ उनले भने। ४/५ वर्षसम्म रुख कटान र जग्गा भोगाधिकार अनुमति नदिइ लगातार रोक लगाउने, अन्य निकायबाट अनुमति लिएर काम गर्दा पनि आयोजनाको काम रोकिँदै आएको उनको भनाइ थियो। सरकारले १० वर्षमा ३० हजार मेगावाट उत्पादन गर्ने लक्ष्य अघि बढाउँदै गर्दा यस्तो गतिविधि बढेमा त्यो लक्ष्य पूरा नहुने उनले बताए। उहाँले सो अवसरमा सरकारले सनसेट नीति ल्याउन तयारी गरिरहेको बेला मन्त्रालयले आयोजनालाई सहजीकरण गर्न पहल गर्नुपर्ने पनि सुझाए। मन्त्री चौधरीले जलविद्युत आयोजना सुरु गर्न मन्त्रालयबाट आवश्यक सहजीकरण गरिने बताइन्। उनले छिटै विकास आयोजनामा देखिएका समस्या समाधान गर्न नीति सुधार गर्ने जानकारी दिइन्। सिन्धुपाल्चोकमा हाल निजी क्षेत्रबाट निर्माणाधीन ३६.५ मेगावाट ब्रह्मायणी जलविद्युत् आयोजना, २०.५२ मेगावाट माथिल्लो ब्रह्मायणी जलविद्युत् आयोजना, ९.७ मेगावाट ब्रह्मायणी ए जलविद्युत आयोजना, ४० मेगावाट बलेफी खोला जलविद्युत् आयोजना र ४६ मेगावाट माथिल्लो बलेफी जलविद्युत् आयोजना गरी जम्मा १५३ मेगावाट जडित क्षमताका पाँच जलविद्युत् आयोजना लाङटाङ राष्ट्रिय निकुञ्जले पत्र लेखेर काम रोक्न निर्देशन दिएको छ। नेपाल सरकारले विभिन्न निकायबाट आयोजना विकास अनुमति दिएको र वन मन्त्रालयले स्वीकृत गरेको वातावरणीय प्रभाव मूल्याङ्कन रिपोर्ट अनुसार निर्माण कार्य अघि बढिरहेको अवस्थामा निकुञ्ज प्रशासनले काम रोक्नुको सट्टा सहजीकरण गर्नुपर्ने बताए। मुलुकको विकासका लागि सरकारले निजी क्षेत्रसँग सहकार्य गर्नुपर्नेमा इप्पानका वरिष्ठ उपाध्यक्ष मोहनकुमार डाँगीले जोड दिए। इप्पानले राष्ट्रिय निकुञ्ज तथा वन्यजन्तु संरक्षण विभागका महानिर्देशक डा. बुद्धिसागर पौडेलसँग भेटेर निकुञ्ज भित्र आयोजना निर्माण रोक्ने निर्देशन सुधार गरी वन मन्त्रालयले वातावरणीय प्रभाव मूल्याङ्कन प्रतिवेदन अनुसार काम गर्नुपर्ने माग पनि गरेको थियो।
