इजरायली सेनाले दक्षिणी लेबननको भैगोलिक क्षेत्र खाली गर्न आदेश जारी गरेको छ। हिज्बुल्लाहमाथि नयाँ आक्रमण गर्नुअघि उक्त क्षेत्रलाई “लडाइँ क्षेत्र” घोषणा गरिएको छ। इजरायली डिफेन्स फोर्सेस् (आईडीएफ)ले त्यहाँका बासिन्दालाई सीमा नजिकै रहेको करिब ४० किलोमिटर (२५ माइल) टाढा जहरानी नदीको उत्तरतर्फ जान निर्देशन दिएको छ। हिज्बुल्लाहले बारम्बार युद्धविराम उल्लंघन गरेको आरोप लगाउँदै आईडीएफले “कठोर कदम” चाल्न चेतावनी दिएको छ। पछिल्ला २४ घण्टामा ९ पटक चेतावनी जारी गरिएको छ। २०२४ को अप्रिल १७ मा लागू भएको युद्धविराम पछि यो सबैभन्दा ठूलो भूभाग खाली गर्ने आदेश हो, जसले लेबननको करिब १४ प्रतिशत क्षेत्रफल ओगटेको छ।
इजरायलले यसअघि बुधबार दक्षिणी शहर टायरमा आक्रमण गरेको थियो। हिज्बुल्लाहले इजरायलले युद्धविराम उल्लंघन गरेको आरोप लगाउँदै आफ्ना लडाकुहरू र इजरायली सेनाबीच झडप भएको जनाएको छ। इजरायली प्रधानमन्त्री बेन्जामिन नेतन्याहूले दक्षिणी लेबननको केही भूभाग नियन्त्रणमा रहेका आफ्नो सेनाले उत्तरी इजरायली बासिन्दामाथि हिज्बुल्लाहले गरेको ड्रोन आक्रमणपछि त्यस क्षेत्रमा सैन्य कारवाही विस्तार गर्न घोषणा गरेका थिए। यसले इजरायल-लेबनन सीमामा ठूलो तनाव र व्यापक स्तरमा सामूहिक विस्थापनको नयाँ लहर आउने आशंका बढाएको छ।
दक्षिणी लेबननको सबैभन्दा ठूलो शहर टायरमा उक्त आदेशपछि तीव्र हवाई आक्रमण भएको थियो। इजरायली सेनाले शहरमा आक्रमण गरेपछि त्यहाँका बासिन्दाहरूले बाल्कनीबाट त्रास र चिन्ताका साथ दृश्य हेरे र आफ्नो फोनमा कैद गरेका थिए। गत महिनाको युद्धविराम लागु हुनुअघि केही मिनेट अघि भएको हवाई आक्रमणमा ५२ वर्षीय रिडाको घर नजिकैको समुद्री तट नजिक एक क्याफे ध्वस्त भएको थियो। उनले भने, “म समुद्र किनारको बन्दरगाहमा पुगेँ, जहाँ धेरै मानिसहरू भेला छन्। मानिसहरूले आफ्ना सामानहरू प्याक गरेका छन्। सबै त्रसित छन्।” जहरानी नदीदेखि दक्षिणतर्फको क्षेत्र खाली गर्ने आदेशमा करिब ३०० गाउँ र शहर पर्दछन्।
लेबनानी मिडियाले दक्षिण र पूर्वी बेका उपत्यकामा इजरायली आक्रमण भएको उल्लेख गरेका थिए, जसमा चार जनाको मृत्यु भएको छ। पछिल्लो २४ घण्टामा भएको बमबारीभन्दा पहिले नै यो अवधि विनाशकारी बनेको थियो जहाँ करिब १५० भन्दा बढी इजरायली हवाई आक्रमणले दक्षिणी लेबनन र बेका उपत्यकाका करिब ५० शहर र गाउँहरू क्षतिग्रस्त भएका थिए। लेबननको स्वास्थ्य मन्त्रालयका अनुसार मङ्गलबार कम्तीमा ३१ जनाको मृत्यु भएको थियो, जसमा टायर शहरको पूर्वी भाग बुर्ज अल–शामालीमा १५ जनाको मृत्यु समावेश छ।
