परराष्ट्र मन्त्रीले अन्तर्राष्ट्रिय सम्बन्धमार्फत विकास र लगानी विस्तारमा सरकारको प्रतिबद्धता व्यक्त गरे

१४ जेठ, काठमाडौं । परराष्ट्र मन्त्री शिशिर खनालले सरकारले नेपालको अन्तर्राष्ट्रिय सम्बन्धलाई देशको विकास, आर्थिक समृद्धि र राष्ट्रिय हित प्रवर्द्धनका लागि प्रभावकारी रूपमा उपयोग गर्न प्रतिबद्धता जनाएको बताएका छन्। रास्वपा टोखा नगरपालिका–९ मा बिहीबार बिहान आयोजित एक कार्यक्रममा मन्त्री खनालले नेपालको अन्तर्राष्ट्रिय सम्बन्ध विश्वका विभिन्न मुलुक तथा अन्तर्राष्ट्रिय संस्थाहरूसँगको कूटनीतिक, आर्थिक, सांस्कृतिक र रणनीतिक सम्बन्धमा आधारित रहेको बताए। नेपालले स्वतन्त्र, असंलग्न र सन्तुलित परराष्ट्र नीति अवलम्बन गर्दै आएको र नेपालको संविधान, संयुक्त राष्ट्रसंघको बेस्सरी, पंचशील सिद्धान्त तथा असंलग्न आन्दोलनका मूल्य–मान्यताका आधारमा परराष्ट्र नीति संचालन भइरहेको उनको भनाइ थियो।

मन्त्री खनालले नेपालको अन्तर्राष्ट्रिय सम्बन्ध सन्तुलित, मैत्रीपूर्ण र बहुपक्षीय सहकार्यमा आधारित रहेको उल्लेख गर्दै राष्ट्रिय हितको संरक्षण, आर्थिक विकास, शान्ति तथा अन्तर्राष्ट्रिय सहकार्यलाई सुदृढ बनाउनु नेपालको परराष्ट्र नीतिको प्रमुख उद्देश्य रहेको बताए। ‘परराष्ट्र मन्त्रालयभित्र ढिलासुस्ती अन्त्य गरी नागरिकलाई समयमै सेवा प्रदान गर्न म कटिबद्ध छु। राहदानी वितरण प्रक्रिया निकै सहज बनाइएको छ,’ उनले भने, ‘पहिले हप्तौँ लाग्ने राहदानी अहिले दुई–तीन दिनमै र कतिपय अवस्थामा भोलिपल्टै उपलब्ध गराउन सकिन्छ।’ उनले विदेशमा रहेका नेपालीका समस्या सम्बोधनका लागि ‘मोफा मित्र’ मोबाइल एप सार्वजनिक गरिएको जानकारी दिएका छन्। अब विदेशमा अलपत्र परेका वा समस्या भोगिरहेका नेपालीले उक्त एपमार्फत सिधै गुनासो दर्ता गर्न सक्ने र मन्त्रीस्तरबाटै त्यसको अनुगमन हुने व्यवस्था गरिएको उनले बताए। निर्वाचनपछि सरकारले सार्वजनिक गरेको ‘१०० बुँदे प्रतिबद्धता पत्र’ अनुरुप काम भइरहेकाले, २०६३ पछि महत्वपूर्ण सार्वजनिक पदमा रहेका व्यक्तिको सम्पत्ति छानबिन गर्ने तथा पुराना भ्रष्टाचारका फाइलहरू खोल्ने प्रक्रिया अघि बढेको जानकारी पनि उनले दिएका छन्। –रासस